काठमाडौं । होटल फरेस्ट इन लिमिटेडको आईपीओमा माग भन्दा झन्डै ८ गुणा बढी आवेदन परेको छ । कम्पनीले १०० रुपैयाँ अंकित मूल्यका ३३ लाख २० हजार कित्ता सेयरको लागि आवेदन माग गरे पनि अन्तिम दिनसम्ममा २३ लाख ३० हजार ८६ आवेदनकर्ताबाट २ करोड ६३ लाख ६० हजार ५ सय कित्ता सेयरको लागि आवेदन परेको हो ।

अन्तिम दिनसम्ममा सो आवेदनमार्फत २ अर्ब ६३ करोड ६० लाख ५० हजार रुपैयाँ जम्मा भएको छ । कम्पनीको सेयर निष्काशक तथा बिक्री प्रबन्धकमा एनआईसी एसिया क्यापिटल रहेको छ । धितोपत्र बोर्डको हरेक लगानीकर्ताले १० कित्ता सेयर पाउने नीति अनुसार ३ लाख ३२ हजार लगानीकर्ताले सेयर पाउने छन् भने १९ लाख ९८ हजार ८६ जनाको हात खाली रहनेछ ।