काठमाडौं । ललितपुरमा चितुवाको आक्रमणमा परेर एक जना घाइते भएका छन् । गएराति साढे ८ बजे ललितपुरको गोदावरी नगरपाललिका– ५ सुनारटोलस्थित गोरेटो बाटोमा चितुवाले आक्रमण गर्दा सोलुखुम्बु घर भएका ६१ वर्षीय रण बहादुर गर्तौला घाइते भएका हुन् ।

उनी कामबाट घर फर्कने क्रममा गोरेटो बाटोमा एक्कासी चितुवाले उनलाई आक्रमण गरेको थियो । चितुवाले आक्रमण गरेपछि घाइतेलाई बचाउने क्रममा स्थानीयले चितुवालाई मारेका थिए । जिल्ला प्रहरी परिसर ललितपुरको मातहत प्रहरी चौकी लेलेबाट प्रहरी टोली खटेर  घाइतेलाई उद्धार गरी आफन्त समेतको सहयोगमा लगनखेलस्थित पाटन स्वास्थ्य बिज्ञान प्रतिष्ठानमा ल्याएर उपचार भइरहेको छ । मृत चितुवाको लागि जिल्ला वन कार्यालयसँग समन्वय गरेको जिल्ला प्रहरी कार्यालय ललितपुरले जनाएको छ ।