काठमाडौं । मुक्तिनाथ विकास बैंक लिमिटेडले संस्थापक समूहको सेयर लिलाम बिक्रीमा राखेको छ । कम्पनीले २ लाख ५८ हजार १८३ कित्ता संस्थापक सेयर लिलामीमा राखेको हो ।

बैंकले सबैले खरीद गर्न पाउने गरी उक्त सेयर लिलामीमा राखेको हो । कम्पनीले सेयरको मूल्य प्रतिकित्ता न्यूनतम १४० रुपैयाँ कायम गरेको छ । सेयर खरीद गर्नका लागि गोप्य शिलबन्दी बोलपत्र पेश गर्दा न्यूनतम १ हजार कित्ताका लागि र अधिकतममा सम्पूर्ण सेयर माग गर्न सकिनेछ । यस्तो बोलपत्र फाराम काठमाडौंको नक्सालस्थित सममार्गमा रहेको सानिमा क्यापिटल लिमिटेड (बिक्री प्रबन्धक) को कार्यालयमा पाइनेछ भने सोही स्थानमा बुझाउन सकिनेछ । बोलपत्र वैशाख ८ गतेदेखि वैशाख १६ गतेभित्र पेश गरिसक्नु पर्नेछ ।

बिक्री अवधिभर परेका बोलपत्रहरू वैशाख १७ गते अपरान्ह ४ बजे सानिमा क्यापिटलको कार्यालयमा बोलपत्रदाता वा निजको प्रतिनिधिको रोहबरमा खोलिने बैंकले जानकारी दिएको छ ।