वीरगञ्ज । वीरगञ्ज नाका हुँदै चालु आर्थिक वर्षको नौ महिनामा ७९ अर्ब ५४ करोड रुपैयाँ मूल्य पर्ने वस्तु तथा सामान विदेशी मुलुकमा निर्यात भएको छ । वीरगञ्ज भन्सार कार्यालयका अनुसार गत आर्थिक वर्षको नौ महिनाको तुलनामा चालु आर्थिक वर्षको सोही अवधिमा १० अर्ब १९ करोड रुपैयाँ अर्थात् १५ प्रतिशत बढी आयात भएको हो ।

जबकि गत आर्थिक वर्षको ९ महिनामा भने ६९ अर्ब ३५ करोड रुपैयाँ मूल्य बराबरको वस्तु तथा सामान विदेशी मुलुकमा निर्यात भएको थियो । वीरगञ्ज भन्सार कार्यालयका सूचना अधिकारी उदयसिंह विष्टले चालु आर्थिक वर्षमा यो नाका हुँदै १५ प्रतिशत निर्यात बढेको बताए । यो नाका हुँदै चालु आर्थिक वर्षको नौ महिनामा ४३ अर्ब ६१ करोड रुपैयाँ मूल्य पर्ने भटमासको प्रशोधित तेल निर्यात भएको छ । पाँच अर्ब ८४ करोड रुपैयाँ मूल्य पर्ने फलफूलको जुस विदेशी मुलुकमा निर्यात भएको छ ।

पाँच अर्ब २४ करोड रुपैयाँ मूल्यको प्रशोधित पाम तेल निर्यात भएको छ । पाँच अर्ब पाँच करोड रुपैयाँ मूल्य पर्ने सूर्यमुखीको प्रशोधित तेल निर्यात भएको छ । दुई अर्ब ६९ करोड रुपैयाँ मूल्यको विभिन्न किसिमका कपडा निर्यात भएको छ ।