काठमाडौं । जीवन बीमा कम्पनीहरुको व्यवसाय ११ प्रतिशतले वृद्धि भएको छ । नेपाल बीमा प्राधिकरणले सार्वजनिक गरेको चैत मसान्तसम्मको विवरण अनुसार गत आर्थिक वर्षको सोही अवधिको तुलनामा जीवन बीमा कम्पनीको व्यवसाय ११.३१ प्रतिशतले वृद्धि भएको हो ।

चालु आर्थिक वर्ष २०८२/०८३ को तेस्रो त्रैमाससम्मको अवधिमा जीवन बीमा कम्पनीहरुले कुल १ खर्ब ४० अर्ब ४५ करोड ७० लाख रुपैयाँको व्यवसाय गरेका छन् । यो १४ वटा ठूला जीवन बीमा कम्पनीहरुले गरेको व्यवसाय हो । कम्पनीहरुले गत आर्थिक वर्षको सोही अवधिमा १ खर्ब २६ अर्ब १८ करोड १२ लाख रुपैयाँ बीमा शुल्क आर्जन गरेक थिए । कुल बीमा शुल्क आर्जनको आधारमा नेपाल लाइफ इन्स्योरेन्स र नेशनल लाइफ इन्स्योरेन्स अग्रस्थानमा छन् भने यो अवधिमा बृद्धिदरका आधारमा आइएमई लाइफ इन्स्योरेन्स र रिलायबल नेपाल लाइफ अगाडि रहेका छन् ।

नेपाल लाइफ इन्स्योरेन्सले सबैभन्दा बढी बीमा शुल्क आर्जन गरेको छ । कम्पनीले गत आर्थिक वर्षको तुलनामा ११.६४ प्रतिशतले व्यवसाय बृद्धि गर्दै ३६ अर्ब ८६ करोड रुपैयाँको व्यवसाय गरेको छ । त्यस्तै दोस्रो स्थानमा रहेको नेशनल लाइफ इन्स्योरेन्सले गत आवको तुलनामा ९.२० प्रतिशतले बढाएर १७ अर्ब ७ करोड रुपैयाँ र एलआइसी नेपालले ८.०८ प्रतिशतले बढाएर १५ अर्ब १७ करोड रुपैयाँ पुर्याएको छ ।

त्यस्तै, हिमालयन लाइफ इन्स्योरेन्सको ब्यवसाय ५.३१ प्रतिशतले बढेर १३ अर्ब २६ करोड, राष्ट्रिय जीवन बीमाको ११.७० प्रतिशतले बढेर ९ अर्ब ११ करोड, सूर्यज्योति लाइफको ११.६७ प्रतिशतले बढेर ८ अर्ब ५५ करोड, एशियन लाइफको १२.११ प्रतिशतले बढेर ७ अर्ब २४ करोड, सिटिजन्स लाइफको १९.२६ प्रतिशतले बढेर ६ अर्ब ६ करोड, सानिमा रिलायन्स लाइफको ११.९२ प्रतिशतले बढेर ५ अर्ब ४२ करोड र आइएमई लाइफको ३१.२३ प्रतिशतले बढेर ४ अर्ब ९५ करोड रुपैयाँको व्यवसाय पु¥याएका छन् ।

समीक्षा अवधिमा मेट लाइफको १०.३८ प्रतिशतले बढेर ४ अर्ब ९० करोड, रिलायबल नेपाल लाइफको २०.५३ प्रतिशतले बढेर ४ अर्ब ४४ करोड, प्रभु महालक्ष्मी लाइफको १४.०७ प्रतिशतले बढेर ४ अर्ब १९ करोड र सन नेपाल लाइफको २.८० प्रतिशतले बढेर ३ अर्ब १७ करोड रुपैयाँ कुल बीमा शुल्क आर्जन पुगेको हो ।