काठमाडौं । अभियान लघुवित्त वित्तीय संस्था लिमिटेडको नाफामा उल्लेख्य सुधार देखिएको छ । कम्पनीले सार्वजनिक गगरेको चालु आर्थिक वर्षको तेस्रो त्रैमासिकसम्मको अपरिष्कृत वित्तीय विवरण अनुसार गत आवको भन्दा ३३७.७३ प्रतिशतले नाफा बढेको हो ।

गत आवको तेस्रो त्रैमासिकसम्म २ करोड २५ लाख रुपैयाँ खुद नाफा कमाएको थियो । चालु आर्थिक वर्षको तेस्रो त्रैमासिकसम्ममा कम्पनीले ९ करोड ८४ लाख रुपैयाँ नाफा कमाएको छ । चालू आवमा कम्पनीको आम्दानी बढेको र इम्पेयरमेन्ट चार्ज घटेकोले नाफामा उछाल आएको हो।

समीक्षा अवधिमा कम्पनीको खुद ब्याज आम्दानी ११ करोड ३ लाख रुपैयाँबाट दोब्बरभन्दा बढीले वृद्धि भई २२ करोड ६० लाख रुपैयाँ नाघेको छ भने कुल सञ्चालन आम्दानी १४ करोड ३६ लाख रुपैयाँबाट ७५ प्रतिशतले बढेर २५ करोड १८ लाख रुपैयाँ नाघेको छ । यससँगै बैंकको सञ्चालन मुनाफा पनि ३ करोड १७ लाख रुपैयाँबाट ३४३.५१ प्रतिशतले बढेर १४ करोड ७ लाख रुपैयाँ पुगेको छ भने वितरणयोग्य मुनाफा ५ करोड ९१ लाख ऋणात्मकबाट २ करोड ६१ लाख रुपैयाँ धनात्मक हुन पुगेको छ ।

यता कम्पनीको प्रतिसेयर आम्दानी पनि १२ रुपैयाँबाट बढेर ५२.५३ रुपैयाँ पुगेको छ भने खराब कर्जा ६.८४ प्रतिशतबाट घटेर ५.१४ प्रतिशतमा झरेको छ । कम्पनीको प्रतिसेयर नेटवर्थ १५७.८४ रुपैयाँ र बेसरेट १०.८४ प्रतिशत रहेको छ। चुक्ता पूँजी २५ करोड रुपैयाँ रहेको यस कम्पनीको जगेडा कोषमा ११ करोड ८४ लाख रुपैयाँ रहेको छ । कम्पनीले चैत मसान्तसम्म ३ अर्ब ५६ करोड रुपैयाँ ग्राहकमा कर्जा परिचालन गरी ३५ करोड रुपैयाँ निक्षेप संकलन गरेको छ । कम्पनीको कुल सम्पत्तिको मूल्य झण्डै ३ अर्ब ६७ करोड रुपैयाँ कायम भएको छ ।