काठमाडौं । नेपाल दूरसञ्चार प्राधिकरणले दूरसञ्चार सेवा प्रदायकहरूलाई उपभोक्ता सेवा गुणस्तर सुधार गर्न कडा निर्देशन दिएको छ ।

प्राधिकरणले आज जारी गरेको सूचनामा हालका दिनहरूमा मोबाइल तथा इन्टरनेट सेवाको गुणस्तरप्रति उपभोक्ताको असन्तुष्टि बढ्दै गएको उल्लेख गरिएको छ। सेवा सम्बन्धी गुनासा तथा उजुरीहरू प्राधिकरणको इमेल, Complaint Handling System (CHS) तथा “हेलो सरकार” पोर्टलमार्फत उल्लेख्य रूपमा वृद्धि भएको बताइएको छ।

प्राधिकरणका अनुसार सेवा प्रदायकहरूले प्रचलित ऐन, नियम तथा सेवा शर्तअनुसार उपभोक्तालाई चुस्त, दुरुस्त र गुणस्तरीय सेवा प्रदान गर्नुपर्ने दायित्व छ। उपभोक्ता गुनासोको समयमै समाधान नगरे सेवा प्रदायकहरूलाई कानुन बमोजिम कारबाही प्रक्रिया अघि बढाइने चेतावनी पनि दिइएको छ ।

प्राधिकरणले सबै दूरसञ्चार कम्पनीहरूलाई सेवा गुणस्तर सुधार गर्दै उपभोक्ता हित संरक्षणलाई प्राथमिकतामा राख्न आग्रह गरेको छ।