काठमाडौं । साविक विजेता रोयल च्यालेन्जर्स बेङ्गलुरु (आरसीबी) आईपीएल क्रिकेटको फाइनलमा पुगेको छ । आरसीबी लगतार दोस्रो पटक फाइनमा पुगेको हो ।

मंगलरबार राति भएको पहिलो क्वालिफायरमा गुजरात टाइटन्सलाई ९२ रनले हराउँदै आरसीबी अन्तिम दुईमा प्रवेश गरेको हो । २५५ रनको लक्ष्य सहित जबाफि ब्याटिङ गरेको जुगरातले १९ ओभर ३ बलमा १६२ रनमा अलआउट भयो । उसका लागि राहुल तेवाटियाले सर्वाधिक ६८ रनको पारी खेले । जस बटलरले २९ रन बाउनु बाहेक अन्यले उल्लेख्य प्रदर्शन गर्न सकेनन् । आरसीबीका लागि याकूब डफीले ३ विकेट लिए । त्यस्तै भुवनेश्वर कुमार, रसिक सलाम दार र कुर्नाल पाण्ड्याले २/२ विकेट लिए ।

यस अघि धर्मशालामा टस हारेर पहिला ब्याटिङ गरेको आरसीबीले निर्धारित २० ओभरमा ५ विकेट गुमाएर २५४ रन बनाएको थियो ।आरसीबीका कप्तान रजत पाटीदारले अविजित ९३ रन बनाए । विराट कोहली र क्रुनाल पाण्ड्याले समान ४३ रन बनाए । पराजित गुजरातले फाइनल पुग्न अब सनराइजर्स हैदराबाद र राजस्थान रोयल्सबीचको इलिमिनेटर विजेतासँग खेल्नेछ । गएको वर्ष पञ्जाबलाई हराउँदै आरसीबीले उपाधि जितेको थियो ।

आईपीएल क्रिकेटको इलिमिनेटरमा आज बेलुका पौने ८ बजे सनराइजर्स हैदराबाद र राजस्थान रोयल्सले खेल्दैछन् ।