काठमाडौं । गत आर्थिक वर्षमा नबिल बैंक लिमिटेडको नाफामा उल्लेख्य सुधार देखिएको छ । बैंकले सार्वजनिक गरेको आर्थिक वर्ष २०८२/८३ को चौथो त्रैमासिकसम्मको अपरिष्कृत वित्तीय विवरण अनुसार अघिल्लो आवको भन्दा नाफा बढेको हो ।

प्रकाशित विवरण अनुसार बैंकको खुद नाफा, खुद ब्याज आम्दानी र लाभांश क्षमतामा अघिल्लो आर्थिक वर्षको तुलनामा वृद्धि देखिएको छ । गत आर्थिक वर्षमा बैंकको खुद नाफा करिब ८ अर्ब नजिक रहेको छ । गत आर्थिक वर्षमा बैंकको नाफा ७ अर्ब ९० करोड ५७ लाख रुपैयाँ रहेको छ । यो अघिल्लो आर्थिक वर्षको सोही अवधिको तुलनामा ३३.५० प्रतिशतले धेरै हो । अघिल्लो आर्थिक वर्षको अन्तिमसम्ममा बैंकको नाफा ५ अर्ब ९२ करोड २१ लाख रुपैयाँ रहेको थियो ।

त्यस्तै, बैंकको खुद ब्याज आम्दानी बढेर १७ अर्ब ९२ लाख रुपैयाँ पुगेको छ । यस्ताो आम्दानी अघिल्लो आर्थिक वर्षको अन्तिमसम्ममा १६ अर्ब ३२ करोड रुपैयाँ रहेको थियो । कर्जा नोक्सानी व्यवस्था (इम्पेरमेन्ट चार्ज) अघिल्लो आर्थिक वर्षको ४ अर्ब २० करोड रुपैयाँबाट घटेर २ अर्ब ६७ करोड रुपैयाँमा झरेको छ । जसले खुद नाफा उकास्न मुख्य योगदान पु¥याएको छ । त्यस्तै, सञ्चालन नाफा अघिल्लो आर्थिक वर्षको ९ अर्ब २३ करोड ५४ लाख रुपैयाँबाट २५.२२ प्रतिशतले बढेर ११ अर्ब ५६ करोड ४५ लाख रुपैयाँ पुगेको छ ।

गत आर्थिक वर्षमा बैंकले सेयरधनीहरूका लागि आकर्षक लाभांश दिन सक्ने बलियो वित्तीय आधार कायम गरेको छ । नियमनकारी समायोजनहरू पश्चात् गत असार मसान्तसम्मको खुद वितरणयोग्य नाफा ४ अर्ब ६९ करोड रुपैयाँ रहेको छ भने अघिल्लो आर्थिक वर्षको सञ्चित नाफा र असार मसान्तसम्मको समायोजन पश्चात् बैंकको कुल वितरणयोग्य नाफा ५ अर्ब १६ करोड ९१ रुपैयाँ पुगेको छ । यस अनुसार साधारण सेयरधनीहरूका आधारमा बैंकको प्रतिशेयर वितरणयोग्य नाफा १९ रुपैयाँ १० पैसा कायम भएको छ ।

गत आर्थिक वर्षको अन्त्यसम्ममा बैंकको कुल सम्पत्तिको आकार ७ खर्ब ३४ अर्ब रुपैयाँ नाघेको छ। बैंकको चुक्ता पूँजी ३२ अर्ब ५ करोड ६९ लाख रुपैयाँ पुगेको छ (जसमा ५ अर्ब रुपैयाँ बराबरको नबिल ८ प्रतिशत अविमोच्य असञ्चिती अग्राधिकार शेयर समेत समावेश छ । सञ्चित नाफा र अन्य जगेडा कोष गरी बैंकको कुल इक्विटी ७१ अर्ब ९० करोड ६५ लाख रुपैयाँ पुगेको छ ।

आर्थिक वर्ष २०८२/८३ को असार मसान्तसम्मको बैंकले वित्तीय कार्यसम्पादनमा निकै मजबुत नतिजा ल्याएको छ । खराब कर्जा घटेर ४.२० प्रतिशतमा आउनु, नेट एनपीएल ०.५८ प्रतिशतमा सीमित हुनु, प्रतिसेयर आम्दानी २८ रुपैयाँ ३६ पैसा पुग्नु र ५.१६ अर्ब वितरणयोग्य मुनाफा कायम हुनुले सेयरधनीहरूका लागि आगामी दिनमा आकर्षक प्रतिफल प्राप्त हुने स्पष्ट संकेत गर्दछ ।