काठमाडौं । यो साता पनि सेयर बजारमा घटेर नै बन्द भयो । पछिल्ला दिनहरुमा लगातार रुपमा घटिरहेको बजार यो साता करिब १ प्रतिशतले घटेको हो ।

गत साता २६४३.८३ विन्दुमा बन्द भएको नेप्से, यो साता ०.९५ प्रतिशत अर्थात २५.११ अंक घटेर २६१८.७२ विन्दुमा बन्द भएको छ । यो साताका पाँच कारोबार दिनमध्ये सेयर बजार ४ कारोबार दिन घट्यो भने एक दिन मात्रै सामान्य बढेको थियो । यो साता फ्लोट इण्डेक्स ३.३७ अंक घटेको छ भने सेन्सेटिभ इण्डेक्स २.०० अंक र सेन्सेटिभ फ्लोट इण्डेक्स १.२१ अंक घटेको छ।

नेप्से घटेपनि यो साता कारोबार रकम भने बढेको छ । गत साता दैनिक औषतमा ३ अर्ब ८६ करोड रुपैयाँको सेयर खरिदबिक्री भएको बजारमा यो साता दैनिक औषतमा ४ अर्ब ४९ करोड रुपैयाँको सेयर कारोबार भएको छ । गत साताको तुलनामा यस साताको दैनिक औषत कारोबार रकम १६.३० प्रतिशत बढेको छ । त्यस्तै, यो साता दैनिक औषत सेयर संख्या १४.१९ प्रतिशत बढेको छ भने दैनिक औषत कारोबार संख्या पनि १०.०८ प्रतिशत बढेको छ ।

यो साता नेप्सेको कुल बजार पूँजीकरण पनि करिब १ प्रतिशत घटेको छ । गत साताको अन्तिम कारोबार दिन ४५ खर्ब ४७ अर्ब रुपैयाँ रहेको नेप्सेको कुल बजार पूँजीकरण, यस साता ४३ अर्ब रुपैयाँ घटेर ४५ खर्ब ४ अर्ब रुपैयाँमा सीमित भएको छ । यो साता १३ उपसमूहमध्ये २ उपसमूहको परिसूचक बढेको छ भने ११ उपसमूहको परिसूचक घटेको छ । यस साता व्यापार उपसमूहको परिसूचक ०.४१ प्रतिशत बढेको छ। गत साता ३२३९.८६ विन्दुमा बन्द भएको सो उपसमूहको परिसूचक, यस साता १३.२९ अंक बढेर ३२५३.१५ विन्दुमा पुगेको छ । त्यस्तै, यस साता उत्पादन तथा प्रशोधन उपसमूहको परिसूचक ०.११ प्रतिशत बढेको छ ।

यस साता वित्त उपसमूहको परिसूचक सर्वाधिक २.३७ प्रतिशत घटेको छ। गत साता २३७४.८९ विन्दुमा बन्द भएको सो उपसमूहको परिसूचक, यस साता ५६.२१ अंक घटेर २३१८.६८ विन्दुमा झरेको छ । अंकका आधारमा भने यस साता जीवन बीमा उपसमूहको परिसूचक सर्वाधिक घटेको हो । गत साता ११ हजार ८०३.८३ विन्दुमा बन्द भएको सो उपसमूहको परिसूचक, यस साता २१०.४१ अंक घटेर ११ हजार ५९३.४२ विन्दुमा झरेको छ ।