काठमाडौं । भियतनामको दानाङमा जारी तेस्रो पिकलबल विश्वकप–२०२६ मा नेपालले ऐतिहासिक सफलता हात पारेको छ । नेपाली खेलाडी दावा सोनाम शेर्पाले पुरुष एकलतर्फ कास्य पदक जित्दै नेपाललाई पिकलबल विश्वकपमा पहिलोपटक पदक दिलाएका छन् ।

अगस्ट ३० देखि सेप्टेम्बर ६ सम्म जारी रहने प्रतियोगितामा दावाले सुरुवाती चरणदेखि नै उत्कृष्ट प्रदर्शन गरेका थिए । सेमिफाइनलमा मंगोलियाका खेलाडीसँग प्रतिस्पर्धा गरेका उनले तेस्रो स्थानका लागि भएको खेलमा ब्राजिलका खेलाडीलाई २१–१२, २१–१२ को सोझो सेटमा पराजित गर्दै कास्य पदक पक्का गरे ।

प्रतियोगिताका खेलहरू भियतनामको दानाङस्थित Tiên Sơn Sports Palace लगायतका आधिकारिक पिकलबल कोर्टमा भइरहेका छन् । पुरुष एकलतर्फ मंगोलियाले स्वर्ण र जापानले रजत पदक जितेका छन् ।

दावा सोनाम शेर्पा पिकलबलका मात्रै खेलाडी होइनन् । पूर्व राष्ट्रिय टेनिस खेलाडीसमेत रहेका दावा व्यावसायिक गल्फ खेलाडी पनि हुन् । टेनिसबाट हासिल गरेको खेल प्रविधि, कोर्टमा प्रतिस्पर्धा गर्ने अनुभव र बल नियन्त्रणसम्बन्धी सीपलाई उनले पिकलबलमा प्रभावकारी रूपमा प्रयोग गर्दै आएका छन् । दावाले यो उपलव्धिलाई आफ्नो व्यक्तिगत सफलता भन्दा पनि नेपाली पिकलबल र समग्र नेपाली खेलकुदका लागि महत्वपूर्ण रहेको बताए । अन्तर्राष्ट्रिय मञ्चमा नेपालको प्रतिनिधित्व गर्दै पदक जित्न पाउनु गौरवको क्षण भएको उनको भनाइ छ । नेपाली खेलकुदको विकास र अन्तर्राष्ट्रिय सहभागिता विस्तारका लागि निरन्तर प्रयास आवश्यक रहेको दावा बताउँछन् ।

दावाको ऐतिहासिक पदक रसुवा बाढीले देश नै विपत्तिमा डुबेको बेला आएको छ । गत बुधवार भदौं १० गते रसुवामा आएको बाढीपहिरोबाट ठूलो जनधनको क्षति भएको घटनाप्रति दुःख व्यक्त गर्दै उनले प्रभावित परिवारप्रति समवेदना पनि व्यक्त गरेका छन् ।

यो विश्वकपमा नेपालबाट १८ सदस्यीय टोलीले सहभागिता जनाएको छ । त्यसैले दावाको कास्य पदकले व्यक्तिगत उपलब्धिमा मात्रै सीमित नभएर नेपाली पिकलबलको अन्तर्राष्ट्रिय यात्रालाई नै नयाँ पहिचान दिएको छ ।

विश्वकपको पहिलो दिनमै नेपालले पदक जित्नुले नेपाली खेलाडीको अन्तर्राष्ट्रिय प्रतिस्पर्धात्मक क्षमता र नेपालमा पिकलबलको बढ्दो सम्भावनालाई विश्वसामु उजागर गरेको छ । दावाको यो कास्य पदक नेपाली पिकलबलको यात्रामा ऐतिहासिक सुरुवात बनेको छ ।