काठमाडौं । संयुक्त राज्य अमेरिकाले बाढीबाट प्रभावित नेपालको पुनः स्थापना तथा पुनर्निर्माणका लागि थप ३१ मिलियन अमेरिकी डलर सहयोग उपलब्ध गराउने भएको छ । न्युयोर्कमा मंगलबार अमेरिकी राजनीतिक मामिलासम्बन्धी उपविदेशमन्त्री एलिसन हुकर र परराष्ट्रमन्त्री शिशिर खनाल बिच भएको भेटवार्तामा अमेरिकाले नेपाललाई थप सहयोग गर्ने घोषणा गरेको हो ।

भेटका क्रममा उपविदेशमन्त्री हुकरले नेपालमा आएको विनाशकारी बाढीबाट प्रभावित सबैप्रति गहिरो समवेदना व्यक्त गरिन् । उनले बाढीमा परी हालसम्म सम्पर्कविहीन रहेका करिब ७० जना अमेरिकी नागरिकका परिवारप्रति पनि सहानुभूति व्यक्त गरिन् ।

अमेरिकी विदेश मन्त्रालयका अनुसार हुकरले प्रभावित क्षेत्रमा स्थायी रूपमा निर्माण गरिने पुलका लागि अमेरिकी संसद्सँग समन्वय गरी १० मिलियन अमेरिकी डलर सहयोग उपलब्ध गराउने पनि घोषणा गरिन् ।

अमेरिकी कम्पनीबाट निर्माण गरिने ती पुलले बाढीबाट क्षतिग्रस्त महत्त्वपूर्ण यातायात पूर्वाधार पुनः स्थापना गर्न सहयोग पुग्ने विश्वास व्यक्त गरिन् । यसैबिच मंगलबार नै अमेरिकी वाणिज्य मण्डलका प्रमुख अन्तर्राष्ट्रिय मामिला अधिकारी डा. जोसुवा वाकरले पनि नेपालका परराष्ट्रमन्त्री खानालसँग भेटवार्ता गरेका छन् ।

भेटवार्तामा नेपालमा आर्थिक सहकार्यलाई थप विस्तार गर्ने विषय तथा नेपाल र अमेरिका बिच व्यावसायिक साझेदारी सुदृढ बनाउने विषयमा छलफल भएको परराष्ट्र मन्त्रालयले जनाएको छ ।