काठमाडौं । आन्तरिक राजस्व विभागले करदाता प्रोत्साहन उपहार कार्यक्रमअन्तर्गत उपहार कुपन प्राप्त गर्न वस्तु तथा सेवा खरिदको बीजक अनिवार्य रूपमा लिनुपर्ने जनाएको छ। विभागले बिहीबार सूचना जारी गर्दै चालु आर्थिक वर्ष २०८३/८४ अन्तर्गत असोज १ गतेदेखि १५ गतेसम्मको उपहार कुपन यही असोज १६ गते खोलिने तथा विजेताको घोषणा गरिने जनाएको हो।

विभागका अनुसार उक्त अवधिमा नगद भुक्तानी गरी वस्तु तथा सेवा खरिद गर्ने उपभोक्ताले असोज १५ गतेभित्र prize.ird.gov.np मा गई खरिद बीलसम्बन्धी विवरण प्रविष्ट गरेर उपहार कुपन प्राप्त गर्न सक्नेछन्। उपहार कार्यक्रममा सहभागी भई पुरस्कार प्राप्त गर्न खरिद बील अनिवार्य भएकाले सबै उपभोक्तालाई वस्तु तथा सेवा खरिद गर्दा अनिवार्य रूपमा खरिद बील लिन विभागले अनुरोध गरेको छ।

त्यस्तै, वस्तु तथा सेवा बिक्री गर्दा अनिवार्य रूपमा बिक्री बील वा बीजक जारी गर्नुपर्ने विभागले जनाएको छ। बिक्री बील वा बीजक जारी नगर्ने व्यवसायीलाई समेत विभागले सूचित गरेको छ।