म्याग्दी । जोगीको भेषमा युवाहरूको समूह नृत्य गर्दै बजारमा निस्केपछि बजारवासीहरू दङ्ग परे । ताण्ड नृत्यसहित शिव, पार्वती र जोगीको भेषमा सजिएर युवाहरूले जोगी नाच प्रदर्शन गरेका हुन् ।

नेवार समुदायले निकाल्ने बर्खे नाच अन्तर्गत शुक्रबार बेनीमा जोगी नाच प्रदर्शन गरिएको हो । नेवार समुदायको मौलिक कला र संस्कृतिको रूपमा प्रस्तुत गर्ने गरिएको बर्खेनाचको आकर्षक मानिएको जोगी नाचमा शिव, पार्वती, जोगीका विभिन्न रूपमा सजिएर नाच प्रदर्शन भिक्षा माग्न पसलहरूमा पुगेका छन् ।

जोगीको हुलमा भेटिएका १५ वर्षीय सज्जन श्रेष्ठले पहिलोपटक जोगी नाच नाचेको बताए । ‘जोगी नाच हाम्रो सांस्कृतिक मौलिक पहिचान हो । संस्कृतिको संरक्षण र जर्गेना गर्ने दायित्व हामी युवाहरूको हो । जोगी नाच नाच्ने सिप र कला पाका पुस्ताबाट सिकेको छु । मैले मेरो सांस्कृतिक पहिचानलाई जोगाउनु छ,’ उलने भने ।

नेवार समुदायको करिब तीन सय वर्ष पुरानो जोगी नाच सांस्कृतिक पहिचानका रूपमा लिने गरिन्छ । जोगी नाच बजारमा ल्याउनु पूर्व लक्ष्मीनारायण मन्दिर परिसरमा महादेव र पार्वतकीको पूजा गरी उनीहरूलाई खुसी पार्न ताण्डव नृत्यसहित जोगी बनाएर बजारमा नचाउने प्रचलन रहेको नेपाल भाषा मंकाःखलःका अध्यक्ष राजेन्द्र कुमार श्रेष्ठले बताए ।

नेवारी समुदायको मौलिक कला संस्कृतिको संरक्षण गरी युवा पुस्तामा हस्तान्तरणका लागि युवाहरूलाई तालिम दिएर कलाकार उत्पादन गरेको जोगी नाच प्रदर्शन संयोजक सुशीलकुमार श्रेष्ठले जानकारी दिए । ‘संस्कृतिको संरक्षणका लागि युवाहरू स्वतःस्फूर्त रूपमा जोगी नाचमा सहभागी भएका छन् । जोगी नाचमा धेरै बजारका युवा र बालकलाहरूले सहभागिता जनाएका छन्,’ उनले भने । नेवार समुदायको मौलिक संस्कृति भएपनि पछिल्लो समय अन्य समुदायका युवाहरू पनि नाचमा सहभागी हुने गरेको उनले बताए ।

नाच प्रदर्शनसँगै शिव, पार्वती र जोगीहरूले घरघर पुगेर भिक्षा माग्नुका साथै आर्सीवाद दिने प्रचलन छ । जोगी नाचबाट बर्खे नाचका लागि खर्च हुने रकम संकलन गर्ने प्रचलन रहेको नेपाल भाषा मंकाःखलः अध्यक्ष श्रेष्ठले बताए ।