काठमाडौं । स्टार फरवार्ड तथा कप्तान केलियन एमबाप्पेलाई बेन्चमा राखे पनि फ्रान्सले सोमबार नेसन्स लिगमा जित निकालेको छ । फ्रान्सले गए राती भएको खेलमा बेल्जियमलाई पराजित गरेको हो ।

पेरिस सेन्ट जर्मेन (पिएसजी) मा एमबाप्पेका दुई पूर्वसहकर्मी रान्डल कोलो मुआनी र ओस्मान डेम्बेलेले गोल गर्दै घरेलु टोलीलाई २–० को जित दिलाएका हुन् । यसअघि फ्रान्स यही मैदानमा शुक्रबार राति भएको खेलमा इटालीसँग ३–१ ले पराजित भएको थियो ।

युरो कप २०२४ को सेमिफाइनलमा उपाधि विजेता स्पेनसँग पराजित भएको दुई महिनापछि फ्रान्स लगातार तेस्रो हारबाट जोगिएको हो । उसले कप्तान समेत रहेका एमबाप्पेलाई सुरुदेखि नै आराम दिइएको थियो । युरो कपपछि रियल मड्रिडका नयाँ स्टारले प्रि–सिजन तयारी निकै कम गरेका थिए र इटालीविरुद्ध ९० मिनेट खेलेका थिए ।

खेलको ३० औं मिनेटमा कोलो मुआनीले गोल गर्दै फ्रान्सलाई अग्रता दिलाएका थिए । ५७औं मिनेटमा डेम्बेलेले अर्को गोल थप्दै फ्रान्सलाई तीन अंक दिलाए । जितसँगै फ्रान्स अंक तालिकाको दोस्रो स्थानमा उक्लिएको छ । फ्रान्सको शीर्ष स्थानमा रहेको इटालीको भन्दा तीन अंक कम छ ।