काठमाडौं । त्रिभुवन विश्वविद्यालय इन्जिनियरिङ अध्ययन संस्थानको डीनका लागि ५ जनाको नाम अल्पसूची (सर्टलिष्ट)मा परेका छन् । डीन छनौट समितिमा परेका आवेदनहरूमध्ये वर्णानुक्रमानुसार अल्पसूची निकालेको हो ।

उनीहरूको प्रस्तुति र अन्तर्वार्ता असोज ११ गते विहान ८ बजेदेखि त्रिवि उपकुलपतिको कार्यालयमा हुनेछ । प्रस्तुति र अन्तर्वार्ताका लागि छनौटमा पर्नेहरूमा प्राडा भोलानाथ शर्मा घिमिरे, प्राडा लक्ष्मण पौडेल, प्राडा संगीता सिंह, प्राडा सुवर्ण शाक्य र प्राडा सुशीलबहादुर बज्राचार्य रहेका छन् ।

संस्थानको डीनका लागि ११ जनाले आवेदन दिएका थिए । जसमा छनौटमा परेमा पाँच जना बाहेक डा.नन्दविक्रम अधिकारी, डा.राजन सुवाल, प्रा.डा महेशचन्द्र लुईंटेल, डा.हरिराम पराजुली, प्रा.डा सुदन झा र डा.जगतकुमार श्रेष्ठले आवेदन दिएका थिए । सावधिक पदमा नियुक्तिका आधार र मापदण्डसम्बन्धी विनियम २०८१ बमोजिम संस्थानको डीन पदका लागि आवेदन दिन आह्वान गरेको थियो । विनियमको परिच्छेद २ मा डीन पदमा नियुक्तिका लागि सिफारिससम्बन्धी व्यवस्था छ ।

जसमा त्रिवि कार्यकारी परिषद्बाट गठन गरिने संयोजक र अन्य २ जना प्राध्यापक वा सहप्राध्यापक सदस्य रहेको समितिले डीनका लागि सिफारिस गर्ने उल्लेख छ । उक्त समितिले तीन जनाको नाम कार्यकारी परिषद्मा पेस गर्ने व्यवस्था छ ।