एजेन्सी । फेसबुकको माउ कम्पनी मेटालाई आयरिस डेटा प्रोटेक्शन कमिसन (डीपीसी)ले पासवर्डको भण्डारणसँग सम्बन्धित अनुसन्धानपछि ९१ मिलियन यूरो अर्थात साढे १३ अर्ब रुपैयाँ जरिवाना गरेको छ । सन् २०१९ अप्रिलमा आइरिस डाटा प्रोटेक्सन कमिसन (डिपिसी)लाई सूचित गरेपछि अनुसन्धान सुरु भएको थियो । जसमा मेटाले फेसबुक प्रयोगकर्ताका पासवर्ड बिना इन्क्रिप्सन भण्डारण गरेको पाइएको थियो ।

डिपिसीले सन् २०२४ को जुनमा अन्य युरोपियन डेटा सुरक्षा निकायहरूलाई यससम्बन्धी प्रारम्भिक प्रतिवेदन पेस गरेको थियो । जसमा अनुसार कुनै पनि निकायले आपत्ती जनाएका थिएनन् । त्यसपछि मेटालाई उक्त जरिवाना लगाइएको हो । अध्ययनमा मेटाले चार सामान्य डेटा सुरक्षा नियमावलीसम्बन्धी चार वटा उल्लङ्घन गरेको पाइएको थियो । डिपिसीका डुपुटी कमिसनर ग्राहम डोयलले ग्राहकहरुका पासवर्डहरु प्लेनटेक्स्टका रुपमा भण्डारण गर्न नहुने सामान्य मान्यता रहेको उल्लेख गर्दै यसले डाटासम्मको पहुँच हुने र दुरुपयोग हुने जोखिम रहने बताए ।

डेटा सुरक्षा आयुक्तहरु डा डेस होगन र डेल सन्डरल्यान्डले मेटालाई यससम्बन्धी सेप्टेम्बर २६ मा जानकारी गराइएको थियो । जसमा मेटालाई चेतावनी र जरिवाना गरिएको छ । सन् २०२३ मेमा मेटालाई युरोप र संयुक्त राज्य अमेरिकाबीच डेटा स्थानान्तरण गर्दा डेटा सही तरिकाले नसम्हालिएको भन्दै १.२ बिलियन यूरो जरिवाना गरिएको थियो । यो जरिवान पनि आयरल्याण्डको डिपिसीले नै लगाएएको थियो । जुन यूरोपियन युनियनको गोपनीयतासम्बन्धी कानूनअन्तर्गत अहिलेसम्मकै ठूलो जरिवाना हो ।

सन् २०२२ मा १०६ देशहरूका ५३३ मिलियन मानिसहरूको डेटा ह्याकिङ फोरममा सार्वजनिक भएपछि मेटालाई २६५ मिलियन यूरो जरिवाना गरिएको थियो ।