काठमाडौं । साताको सेयर कारोबार हुने अन्तिम दिन नेप्से परिसूचकसँगै कारोबार रकम पनि घटेको छ । आज सेयर बजार परिसूचक १८ अंकले घट्यो भने कारोबार रकममा पनि गिरावट आएको हो ।

आजको कारोबार बन्द हुँदा सेयर बजार परिसूचक १८ दशमलव २५ अंकले घटेर २६२७ दशमलव १४ विन्दुमा पुगेको हो । आज सेयर बजारमा कारोबार भएका कम्पनीमध्ये १७० कम्पनीको सेयर मूल्य घटेको छ भने ६७ कम्पनीको सेयर मूल्य मात्रै बढेको छ । त्यस्तै ७ कम्पनीको सेयर मूल्य स्थिर हरेको छ । त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि २ दशमलव ९९ अंकले घटेर ४७४ दशमलव २६ विन्दुमा पुगेको छ ।

आज १३ उपसूचकमध्ये हाइड्रोपावर उपसूचक बाहेक सबै उपसूचकको सेयर मूल्य घटेको छ । परिसूचकसँगै आज कारोबार रकममा पनि गिरावट आएको छ । अघिल्लो दिन ६ अर्ब २७ करोड माथिको कारोबार भएको बजारमा आज ५ अर्ब ४१ करोड भन्दा बढीको मात्रै कारोबार भएको छ । आज सेयर बजारमा ३१७ कम्पनीका १ करोड २२ लाख ८३ हजार ६२३ कित्ता सेयर ६१ हजार ७८५ पटक खरिद बिक्री हुँदा ५ अर्ब ४१ करोड ९१ लाख ४ हजार १५७ रुपैयाँ बराबरको कारोबार भएको छ ।

आज सेयर बजारमा एक कम्पनीको सेयर मूल्यमा नकारात्मक सर्किट लागेको छ । आजको कारोबार बन्द हुँदा रावा इनर्जि लिमिटेडका सेयर मूल्यमा नकारात्मक सर्किट लागेको हो ।