काठमाडौं । डिफेन्डिङ च्याम्पियन रियल मड्रिडले च्याम्पियन्स लिगमा दोस्रो हार बेहोरेको छ । घरेलु मैदानमा मंगलबार राति भएको खेलमा रियल इटालियन क्लब एसी मिलानसँग ३–१ ले पराजित भएको हो ।

मिलानको भने यो दोस्रो जित हो । जितसँगै १८औं स्थानमा उक्लिएको मिलानले चार खेलमा ६ अंक पु¥याएको छ । समान खेल खेलेको रियल समान अंकसहित १७औं स्थानमा छ । खेलको १२औं मिनेटमै मलिक थियाको गोलमार्फत मिलानले सुरुआती अग्रता लिएको थियो । तर, २३औं मिनेटमा भिनिसियस जुनियरले पेनाल्टीमा गोल गर्दै रियललाई खेलमा फर्काए । ३९औं मिनेटमा अल्भारो मोराटाले गोल गरेसँगै मिलानले खेलमा दोस्रोपल्ट अग्रता लिएको थियो । त्यो अग्रता मिलानले कायम मात्रै राखेको अझ लम्ब्याउन सफल भयो । ७३औं मिनेटमा तिजानी रेइन्डर्सले अर्को गोल थपे ।

हालान्डको पेनाल्टीमा चुक्दा सिटीले पहिलो हार

भिक्टर ग्योकेरेसको ह्याट्रिकसँगै पोर्चुगिच क्लब स्पोर्टिङ सिपीले च्याम्पियन्स लिगमा म्यानचेस्टर सिटीलाई पराजित गरेको छ । घरेलु मैदानमा मंगलबार राति भएको खेलमा सिपीले इङ्लिस क्लब सिटीलाई ४–१ ले पराजित गरेको हो । जितसँगै चार खेलबाट १० अंक पुर्‍याएको सिपी दोस्रो स्थानमा उक्लिएको छ। पराजित सिटी समान खेलबाट सात अंकसहित छैटौं स्थानमा छ । लिगमा उसको यो पहिलो हार हो ।

सिटीका स्ट्राइकर एर्लिङ हालान्डले पेनाल्टी मिस गरेका थिए । तर, ग्योकेरेसले ह्याट्रिकको क्रममा दुई स्पट किकलाई गोलमा परिणत गर्दै सिपीलाई ४–१ को जित दिलाएका हुन् ।

लिभरपुलको अपराजित यात्रा जारी

लुइस डियाजको ह्याट्रिकसँगै लिभरपुलले च्याम्पियन्स लिगमा आफ्नो अपराजित यात्रा कायमै राखेको छ । एनफिल्डमा मंगलबार राति भएको खेलमा लिभरपुलले जर्मन क्लब बायर लेभरकुजेनलाई ४–० ले हराएको हो । योसँगै लिभरपुल शीर्ष स्थानमा उक्लिएको छ ।

चार खेलमा शतप्रतिशत जित निकालेको लिभरपुलको १२ अंक छ। पराजित लेभरकुजेन पाँच अंकसहित १२ औं स्थानमा छ । डियाजले ६१, ८३ र दोस्रो हाफको इन्जुरी समयको दोस्रो मिनेटमा गोल गर्दै ह्याट्रिक पूरा गरेका थिए । यस्तै, कोडी गाक्पोले ६३ औं मिनेटमा गोल गरेका थिए ।