काठमाडौं । बुधबार पनि सेयर बजार सामान्य अंकले घटेको छ । अघिल्लो दिन पनि सामान्य अंकले घटेको बजार आज पनि १ दशमलव ८८ अंकले घटेको हो ।

आजको कारोबार बन्द हुँदा सेयर बजार परिसूचक २६७५ दशमलव ५१ विन्दुमा पुगेको छ । तिहारपछि बजार खुलको दोस्रो दिन पनि सेयर बजार ओरालो लागेको हो । त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ० दशमलव ८१ अंकले घटेर ४७७ दशमलव १८ विन्दुमा पुगेको छ ।

आजको कारोबार बन्द हुँदा १३ उपसमूहको परिसूचकमध्ये ५ वटाको सेयर मूल्य बढेको छ भने बाँकी ८ वटाको सेयर मूल्य भने घटेको छ । परिसूचक घटे पनि कारोबार रकममा भने सामान्य सुधार आएको छ । आज सेयर बजारमा कारोबार भएका कम्पनीमध्ये १२१ कम्पनीको सेयर मूल्य बढेको छ भने ११७ कम्पनीको सेयर मूल्य भने घटेको छ । त्यस्तै ६ कम्पनीको सेयर मूल्य भने स्थिर रहेको छ ।

अघिल्लो दिन ४ अर्ब २० करोड बढीको कारोबार भएको बजारमा आज ५ अर्बभन्दा बढीको कारोबार भएको छ । आज सेयर बजारमा ३२० कम्पनीका १ करोड १६ लाख ८६९ कित्ता सेयर ५५ हजार २३८ पटक खरिद बिक्री हुँदा ५ अर्ब २२ करोड २४ लाख ८६ हजार ८५१ रुपैयाँको कारोबार भएको छ ।

आज सेयर बजारमा २ कम्पनीको सेयर मूल्यमा सकारात्मक सर्किट लागेर बन्द भएको छ ।