रामेछापा । यतिबेला रामेछापका जुनार बगैँचाहरु पहेँलपूर हुँदै छन् । जुनारको जिल्लाका रुपमा देशब्यापी पहिचान बनाएको रामेछापमा यसवर्ष जुनार उत्पादन बढ्ने अनुमान गरिएको छ ।

गत वर्ष ४ हजार ५ सय मेट्रिकटन जुनार उत्पादन भएकोमा यस वर्ष ४ हजार ५३६ मेट्रिकटन जुनार उत्पादन हुने अनुमान गरिएको छ । प्रधानमन्त्री कृषि आधुनिकीकरण परियोजना रामेछापका अनुसार यस वर्ष जुनारमा कुनै प्रकारको रोग तथा किरा नदेखिएका कारण जुनारको उत्पादन बढ्ने देखिएको हो ।

प्रधानमन्त्री कृषि आधुनिकीकरण परियोजना रामेछापका सूचना अधिकारी विनिसा श्रेष्ठका अनुसार हाल रामेछाप जिल्लामा कुल ५४० हेक्टर जमिनमा जुनार खेती हुँदै आएको छ । किसानले प्रतिकिलो ५० रुपैयाँका दरले मात्रै बिक्री गर्दा पनि यसवर्ष २२ करोड ६८ हजार रुपैयाँ बराबरको जनार उत्पादन हुने अनुमान गरिएको उनको भनाइ छ ।

कृषि ज्ञान केन्द्र मन्थली र प्रधानमन्त्री कृषि आधुनिकीकरण परियोजना कार्यक्रम कार्यान्वयन इकाईले रामेछापका किसानलाई अमीलो जातका फलफूल खेतीमा सहयोग गर्दै आएको छ । जसका कारण किसानहरु जुनार खेतीमा आकर्षित भइरहेका छन् ।

रामेछापको ओख्रेनी, च्यास्कु, सुकाजोर, रामेछाप, रामपुर, हिमगंगा, सालु, देउराली, सुनारपानी, भलुवाजोर लगायतका साविकका गाविसहरुमा व्यवसायिक जुनार खेती हुँदै आएको छ । रामेछापको जुनार राजधानी काठमाडौँसहित देशका प्रमुख बजार तथा कोशेलीका रुपमा विदेशमा समेत पुग्दै आएको छ ।