काठमाडौं । आज सेयर बजार परिसूचक दोहोरो अंकले बढेर बन्द भएको छ । अघिल्लो दिन पनि दोहोरो अंकले नै बढेको बजार आज १७ दशमलव ८० अंकले बढेर बन्द भएको हो ।

आजको कारोबार बन्द हुँदा नेप्से परिसूचक २७७५ दशमलव ८५ विन्दुमा पुगेको छ । अघिल्लो दिन पनि सेयर बजार २० अंकले बढेको थियो । आज सेयर बजारमा कारोबार भएका कम्पनीमध्ये १४२ कम्पनीको सेयर मूल्य बढेको छ भने ९७ कम्पनीको सेयर मूल्य घटेको छ । त्यस्तै ५ कम्पनीको सेयर मूल्य भने स्थिर रहेको छ ।

त्यस्तै आज ‘क’ वर्गका कम्पनीको मापक सेन्सेटिभ इन्डेक्स भने ० दशमलव ५८ अंकले घटेर ४७१ दशमलव २१ विन्दुमा पुगेको छ । आज सेयर बजारमा १३ उपसूचकमध्ये ७ उपसूचको सेयर मूल्य बढेको छ भने ६ वटा उपसूचकको सेयर मूल्य भने घटेको छ । परिसूचक बढ्न पनि आज कारोबार रकममा भने गिरावट देखिएको छ । अघिल्लो दिन साढे १० अर्ब माथिको कारोबार भएको बजारमा आज साढे ८ अर्बभन्दा माथिको मात्रै कारोबार भएको छ ।

आज सेयर बजारमा ३०७ कम्पनीका १ करोड ८१ लाख ६० हजार ६३४ कित्ता सेयर ८८ हजार ७७५ पटक खरिद बिक्री हुँदा ८ अर्ब ५२ करोड १२ लाख १९ हजार २९९ रुपैयाँ बराबरको कारोबार भएको छ । आज सेयर बजारमा कारोबार भएका कम्पनीमध्ये ५ कम्पनीको सेयर मूल्यमा सकारात्मक सर्किट लागेको छ ।