काठमाडौं । नेपाल प्रिमियर लिग (एनपीएल)मा बेटिङ (सट्टेबाजी) खेलाएको आरोपमा चार जना व्यक्ति पक्राउ परेका छन् । प्रहरीको केन्द्री अनुसन्धान ब्यूरो (सीआईबीले चार जना भारतीय नागरिकलाई पक्राउ गरेको हो ।

सीआईबीका अनुसार सोमबार दुई र मंगलबार दुई गरी कीर्तिपुरबाट चार जनालाई पक्राउ गरिएको छ । सीआईबीले सोमबार भारतको कोलकत्ता बाह्रसान बवुनगाद्धी घर भएका २४ वर्षीय सुमन धोष र भारतको उत्तर प्रदेश कानपुरका २५ वर्षीय अमित यादवलाई त्रिविस्थित क्रिकेट मैदानबाट पक्राउ गरेको थियो । सोही ठाउँबाट मंगलबार भारतको बिहार सहरसा वार्ड–२ खबरीका २७ वर्षीय सुमन्त कुमार र सहरसा हरंसरीका ३० वर्षीय ब्रेजेश कुमारलाई सीआईबीले पक्राउ गरेको छ ।

उनीहरुबाट विभिन्न कम्पनीका ६ थान मोबाइल र चार थान भारतीय आधारकार्ड समेत बरामद भएको छ । पक्राउ परेका चारै जनाविरुद्ध काठमाडौं जिल्ला अदालतबाट ५ दिनको म्याद थप गरेर अनुसन्धान भइरहेको छ ।