काठमाडौं । मेडिकल व्यवसायी दुर्गा प्रसाईंलाई थप चार दिन हिरासतमा राख्न अदालतले अनुमति दिएको छ । प्रसाईँलाई चार दिन हिरासतमा राखेर अनुसन्धान गर्न जिल्ला अदालत काठमाडौंले अनुमति दिएको हो ।

मंगलबार जिल्ला अदालतका न्यायाधीश ईश्वरीप्रसाद भण्डारीको इजलासले उनलाई चार दिन हिरासतमा राख्न अनुमति दिएको हो । प्रसाईंमाथि साइबर ब्युरोले विद्युतीय कारोबार ऐन, २०६३ अनुसार अनुसन्धान गरिरहेको छ । उनले कम्बोडियाको टेलिकममा प्रधानमन्त्री केपी शर्मा ओलीले लगानी गरेको भन्दै विभिन्न अपुष्ट कागजात सार्वजनिक गरेका थिए ।

त्यसपछि केन्द्रीय अनुसन्धान ब्युरो सिआइबीले उनलाई भक्तपुरस्थित निवासबाटै मंसिर ४ गते पक्राउ गरेको थियो । सिआइबीमै व्यापारीहरूलाई भारतीय गुण्डाको नाम लिएर धम्की दिएको भन्ने उजुरीहरू परेका थिए। उक्त उजुरीपछि प्रहरीले प्रसाईंकै सहयोगी हरिचन्द्र फुयाललाई पक्राउ गरेको थियो । उनले बयानका क्रममा प्रसाईंकै निर्देशनमा धम्क्याएको बताएका थिए । उनीमाथि आपराधिक लाभ लिन नहुने कसुरमा अनुसन्धान भइरहेको छ ।