काठमाडौं । भुटानी राजा जिग्मे खेसार नाम्ग्याल वाङ्चुक शुक्रवार काठमाडौं आएका छन् । शुक्रवार बिहान भारतबाट काठमाडौं ओर्लिएका नाम्ग्यालले बौद्ध स्तुपको अवलोकन गरेका छन् । झन्डै एक घण्टा बौद्ध क्षेत्रमा बिताएका उनले पूजाआजा पनि गरेका थिए ।

निजी भ्रमणको सिलसिलामा नेपाल आएका उनले छोटो नेपाल बसाईको क्रममा दुई महत्वपूर्ण बौद्ध तिर्थस्थलको दर्शन गरेका हुन् । भुटानी राजा वाङचुकले विश्वसम्पदा सूचीमा सूचीकृत स्वयम्भूनाथको पूजा अर्चनासहित दर्शन गरेका छन् ।

स्वयम्भू व्यवस्थापन तथा संरक्षण महासमितिका पदाधिकारीले स्वयम्भू परिसरमा भुटानी नरेशलाई स्वागत गरेका थिए । करिब आधा घण्टा त्यहाँ रहेका भुटानी नरेशले स्वयम्भूबाटै काठमाडौँ उपत्यकाको अवलोकन पनि गरेका थिए । त्रिभुवन अन्तर्राष्ट्रिय विमानस्थल हुँदै आज नै उनी स्वदेश फर्किएका छन् । नेपालमा रहँदा उनले कसैसँग औपचारिक भेटघाट भने गरेनन् ।

नेपालमै जन्मिएका भुटानी राजा

भुटानका राजा जिग्मे खेसर नाम्गेल वाङचुक नेपालमै जन्मिएका हुन् । राजा जिग्मेले आफू नेपालमा जन्मेको र नेपालीसँग आफ्नो भावनात्मक सम्बन्ध रहेको बताउँदै आएका छन् । त्यस्तै राजा जिग्मेले नेपाल र भुटानबीच गहिरो सांस्कृतिक सम्बन्ध रहेको र दुबै देश भूपरिवेष्ठित रहेकाले मिलेर अघि बढ्नुपर्नेमा समेत जोड दिने गरेका छन् ।

राजा जिग्मेको सन् १९८० मा नेपालको प्रसूति गृहमा जन्म भएको थियो । उनकी आमा छिरङ योङ दोनलेको इच्छाअनुसार उनको जन्म नेपालमा भएको हो । नेपालमा राम्रो अस्पताल भएकाले पनि तत्कालिन रानीको प्रसूति नेपालमा गराइएको थियो । जानकारहरुका अनुसार तत्कालिन रानी छिरङले हलेसी महादेवको मन्दिरमा पूजा गरेको र पुत्रका रुपमा जिग्मेको जन्म भएको पनि बताइन्छ । त्यतिबेला राजा वीरेन्द्रले भुटानी राजपरिवारप्रति सहयोग तथा सद्भाव राखेका थिए । दुबै देशका राजपरिवारबीच घनिष्ठ सम्बन्ध थियो । केही समय अघि भुटानी राजपरिवारतको निम्तोमा पूर्वराजा ज्ञानेन्द्र शाह भुटानको भ्रमणमा गएका थिए ।