काठमाडौं । पछिल्लो समय नेपाली चलचित्रहरुले राम्रो व्यापार गरिरहेको अवस्था छ । दशैँको छेको पारेर रिलिज भएका चलचित्रदेखि तिहारको समयमा प्रदर्शनमा आएका चलचित्रले पनि बक्स अफिसमा राम्रो कलेक्सन गरे । अझै भनौँ सन् २०२४ मा नेपाली चलचित्रहरुले निकै नै राम्रो व्यापार गर्न सफल भए । चाडपर्वलाई लक्षित गरेर प्रदर्शन भएका चलचित्रले राम्रो व्यापार गर्दा फरक कथा वस्तु र परिवेशमा निर्माण भएको चलचित्र कार्साङ यहि पुसको २६ गते देशभर प्रदर्शनमा आउँदै छ । यो चलचित्रका सम्बन्धमा चलचित्र लेखक तथा निर्देशक एम शेर्पासँग द शेर्पा टाइम्सले गरेको कुराकानीको सम्पादित अंश :

कार्साङ कस्तो कथा वस्तुमा निर्माण भएको छ ?

कार्साङ पारिवारिक चलचित्र हो । यो फरक भुगोल र परिवेशमा निर्माण गरिएको चलचित्र हो । एक किसिमको फरक मानिविय भाव समावेश भएको चलचित्र हो । आम नेपाली अझै भनौँ शेर्पा समुदायमा आधारीत यो चलचित्रमा शेर्पा समूदायले समेत अनुभूति नगरेका विषयहरु समेटिएका छन् । फरक जीवनशैली र फरक संस्कृतिको विषय चलचित्रमा देख्न पाइने छ ।

यो चलचित्रमा को को पात्रहरु छन् ?

हाम्रो यो चलचित्रमा पहिले देखिनै चलिरहेका कलाकारहरु छन् । चलचित्रमा दयाहाङ, जितु नेपाल, दिया मास्के, रविन्द्र झा, बृद्धि तामाङ,प्रेम लोप्चन लगायतका कलाकारहरुको अभिनय देख्न पाइने छ ।भने यहि चलचित्रबाट सृजना निङ्लेकु नायिकाको भुमिकामा डेब्यु गर्दै छन।
त्यस्तै शेर्पा समुदायका चर्चित कलाकार कर्म शेर्पा, डोल्मा ह्योल्मो, लाई पनि हामीले चलचित्रमा देख्न पाउने छौँ ।

कार्साङ फिल्म किन हेर्ने ?

दर्शकले किन हेर्ने भन्दा पनि हामीले यो चलचित्रमा विश्वमा नै अहिलेसम्म नदेखिएको संस्कृतिलाई चलचित्रमा देखाइएको छ । जुन संस्कृति सिन्धुपाल्चोकको यार्सा गाउँमा मात्रै चलन चल्तिमा रहेको छ । त्यो संस्कृतिको शेर्पा समूदाय भित्र पनि एक किसिमले नयाँ हुन्छ भन्ने हाम्रो अपेक्षा रहेको छ । फरक संस्कृतिका विषयमा जानकारी दिनका लागि पनि दर्शकहरु हलसम्म जानु पर्छ भन्ने हो ।

अन्य समूदायभन्दा फरक संस्कृति यार्सा गाउँमा रहेको र त्यो संकृतिको विषय माथि बनेको चलचित्र भएकाले फरक अनुभव लिनका लागि पनि चलचित्र हलसम्म जानु पर्ने हुन्छ ।

यो तपाईको कति औँ चलचित्र हो र यसका गारो सारो पक्ष के रह्यो?

यो मेरो पहिलो चलचित्र हो । यसमा कथा लेखन देखि निर्देशनसम्मको काम म आफैँले गरेको छु । साउनमा छायाँकनमा गएको र पुस २६ गते यो रिलिज हुन्छ । हेर्दा कम समय देखिए पनि यो चलचित्र बनाउनका लागि विगत २ वर्षदेखि निरन्तर यो विषयमा तयारी गरेर निर्माण गरिएको हो । यसरी हेर्दा समय छोटो जस्तो लागे पनि पर्दा पछाडि निकै लामो समय देखि चलचित्रका विषयमा तयारी गरिरहेका थियौँ । कलाकारहरुले निकै महेनत गरेका छन।

चलचित्र कहाँ छायाँकन भयो ?

चलचित्रको मुख्य कथा बस्तु नै सिन्धुपाल्चोकको यार्सा गाउँको भएकाले धेरै जासो चलचित्रका सिनहरु सिन्धुपाल्चोकका नै छन् । जहाँ यो संस्कृति प्रयोग हुन्छ त्यो ठाउँमा नै हो । त्यसैले सिन्धुपाल्चका यार्सा, थाङसीङगोले र अन्थलीमा यो चलचित्र छायाँकन गरिएको छ । यो संस्कृतिको प्रयोग पनि यहि क्षेत्रमा रहेको छ । जसले गर्दा हामीहरुले यो ठाउँलाइ नै लोकेशनका रुपमा छनोट गरेका हौँ ।

अन्त्यमा के भन्न चाहानु हुन्छ ?

अन्त्यमा मैले भन्ने भनेको पुस २६ गतेदेखि प्रदर्शनमा आउने हाम्रो चलचित्रलाई हेरेर माया गरिदिनु होस् । हलमा गएर हेरेर त्यसको प्रतिक्रिया पनि दिनका लागि म सबैलाई आग्रह गर्दछु । हामीहरुले देशभर र विदेशमा पनि पुसर २६ गते एकै साथ चलचित्र प्रदर्शन गर्दैछौँ । शेर्पा समुदायमा पनि छुट्टै संस्कार संस्कृतिलाई उजागर गरेकाले सबैले यो ठाउँको निश्चित संस्कार बुझ्नका लागि पनि चलचित्र हुर्नु पर्ने हुन्छ ।

हामीहरु चलचित्रबाट निकै नै आशाबादी छौँ । फरक संस्कृति र फरक विषयमा बनेको चलचित्र भएकाले दर्शकले फरक किसिमको मनारोञ्जन पाउनु हुने छ । विशेष गरेर शेर्पा संस्कृति माथि बनेको चलचित्र भएकाले यसको सफलताले धेरै अरु संस्कृतिमा पनि चलचित्र निर्माण हुने वातावरण निर्माणका लागि पनि कार्साङ चलचित्र हेर्नुहोस् भन्ने आग्रह गर्दछु ।

हाम्रो नेपाल निकै धेरै भौगोलिक र सास्कृतिक विविधता र जात जाति भएको देश हो । यहाँका सबै जातजातिका कला संस्कृतिका विषयमा चलचित्रहरु निर्माण हुनु पर्छ भन्ने हो । नेपाल प्रचुर मात्रामा कथाले भरिएको देश हो। यो चलचित्रमा सफलता मिलेको खण्डमा अन्य यस्तै फरक फरक संस्कृति र चालचलन लगायत विषयमा खोज अनुसन्धानमा मेहनत गरेर चलचित्र निर्माण पनि हुने छन् भन्ने अपेक्षा गरेका छौँ । सबैलाई पौष २६ मा आ आफ्ना नजिकका सिनेमा हलमा फेरि निमन्त्रणा दिन चहान्छु।