काठमाडौं । उप्रप्रधान तथा अर्थमन्त्री विष्णु पौडेलले वर्तमान सरकार बलियो रहेको र आर्थिक स्थायित्व कायम गर्ने तर्फ लागेको बताएका छन् । आइतबार काठमाडौंमा आयोजित ट्रेकिङ्ग एजेन्सिज एसोसिएसन अफ नेपाल (टान) को ४७ औं वार्षिक साधारणसभामा बोल्दै अर्थमन्त्री पौडेलले यस्तो बताएका हुन् ।

‘यो सरकार संसदीय अंकगणित भित्र सबैभन्दा बलियो र स्थिर सरकार हो । यो सरकारले आर्थिक स्थायित्वका लागि कुनै पनि कसर बाँकी राख्दैन,’ उनले भने । अर्थमन्त्रीले अहिलेको जस्तो सरकार अर्को बन्नै नसक्ने दाबी पनि गरे । उनले इतिहास, योगदान र भविष्य भएको ठूला दुई दल मिलेर सरकार बनेको हुँदा राजनीतिक स्थिरताको सुनिश्चितता भएको उल्लेख गर्दै यो सहकार्य २०८४ सालको निर्वाचनसम्म निरन्तर रहने दाबी समेत गरे ।

‘अहिलेको संसदीय अंक गणित भित्र यसभन्दा बलियो र स्थिर सरकार अर्को हुन सक्दैन । हामीले यसबीचमा स्थिरता कायम गरेका छौं । अब सरकार फेरिन्छ भन्ने आशंका र दुबिधाबाट देश निस्किएको छ,’ उनले भने । त्यस्तै, अर्थमन्त्री पौडेलले पर्यटन प्रवर्द्धनलाई सरकारको प्राथमिकतामा राखिएको जनाउँदै नीति, कार्यक्रम र बजेटमार्फत महत्वपूर्ण कार्यक्रम घोषणा भइसकेको बताए । पर्यटन प्रवर्द्धनका लागि सरकारले कुनै कमी नराख्ने स्पष्ट पार्दै उनले सरकार आवश्यक सबै कदम चाल्ने प्रतिवद्धता व्यक्त गरे । ‘अहिले सरकारले पर्यटन प्रवद्र्धनका लागि नीति, कार्यक्रम र बजेटमार्फत महत्वपूर्ण कार्यक्रम घोषणा गरेको छ । त्यसतर्फ नै हाम्रो ध्यान छ । गर्नुपर्ने जे हो, सरकारले सबै गर्छ,’ उनले भने ।