काठमाडौं । काठमाडौं जिल्ला प्रशासन कार्यालयले आजदेखि चक्रपथभित्र कर्फ्यू आदेश जारी गरेको छ। प्रमुख जिल्ला अधिकारीको निर्देशनअनुसार बिहान ८ बजेदेखि आदेश लागू गरिएको हो।

कर्फ्यू बालकुमारी पुलदेखि कोटेश्वर चोक हुँदै सिनामंगल, गौशाला, चाबहिल, नारायणगोपाल चोक, गोङ्गबु, बालाजु, स्वयम्भू, कलंकी, बल्खु हुँदै वागमती नदीको पुलसम्म फैलिएको चक्रपथभित्र लागू गरिएको जिल्ला प्रशासनले जनाएको छ।

सोमबार जेनजीले गरेको आन्दोलनका क्रममा प्रहरीको गोली लागेर १९ जनाको ज्यान गएपछि राजधानीमा थप तनाव फैलिन सक्ने सम्भावना बढेको थियो। सम्भावित दुर्घटना र अप्रिय घटना रोक्न भन्दै प्रशासनले कर्फ्यू आदेश जारी गरेको हो।