काठमाडौं । चालु आर्थिक वर्ष २०८२/८३ को १० महिनामा निर्जीवन बीमा कम्पनीहरुले ४० अर्ब २९ करोड ५७ लाख रुपैयाँ कुल बीमाशुल्क आर्जन गरेका छन् । हाल देशमा संचालित १४ वटा निर्जीवन बीमा कम्पनीहरुले वैशाख मसान्तसम्म उक्त रकम बराबरको व्यवसाय गरेका हुन् ।

गत आवको सोही अवधिको तुलनामा १४.८१ प्रतिशतले बढी हो । गत आवको सोही अवधिमा निर्जीवन बीमा कम्पनीहरुले ३५ अर्ब ९ करोड ८० लाख रुपैयाँ कुल बीमाशुल्क आर्जन गरेका थिए।

सबैभन्दा धेरै व्यवसाय गर्ने कम्पनीमा शिखर इन्स्योरेन्स रहेको छ । कम्पनीले वैशाख मसान्तसम्म ५ अर्ब १९ करोड २२ लाख रुपैयाँ कुल बीमाशुल्क आर्जन गरेको छ। यो गत आवको तुलनामा १०.९० प्रतिशतले बढी हो । गत आवको सोही अवधिमा कम्पनीले ४ अर्ब ६८ करोड १८ लाख रुपैयाँ कुल बीमाशुल्क आर्जन गरेको थियो।

दोस्रोमा हिमालयन एभरेष्ट इन्स्योरेन्सको व्यवसाय ४२.०५ प्रतिशतले बढेर ४ अर्ब ३७ करोड ७९ लाख रुपैयाँ पुगेको छ । गत आवको सोही अवधिमा कम्पनीले ३ अर्ब ८ करोड १८ लाख रुपैयाँ कुल बीमाशुल्क आर्जन गरेको थियो।

तेस्रोमा सगरमाथा लुम्बिनी इन्स्योरेन्सको व्यवसाय ५.३७ प्रतिशतले बढेर ४ अर्ब २५ करोड ८६ लाख रुपैयाँ पुगेको छ। गत आवको सोही अवधिमा कम्पनीले ४ अर्ब ४ करोड १५ लाख रुपैयाँ कुल बीमाशुल्क आर्जन गरेको थियो।

त्यस्तै, आइजीआई प्रुडेन्सियल इन्स्योरेन्सको व्यवसाय १६.३६ प्रतिशतले बढेर ३ अर्ब ५१ करोड ८३ लाख रुपैयाँ, सिद्धार्थ प्रिमियर इन्स्योरेन्सको ०.४२ प्रतिशतले बढेर ३ अर्ब ४९ करोड ४५ लाख रुपैयाँ, एनएलजी इन्स्योरेन्सको ४२.०४ प्रतिशतले बढेर ३ अर्ब ४४ करोड ३६ लाख रुपैयाँ, नेको इन्स्योरेन्सको ११.७० प्रतिशतले बढेर ३ अर्ब १ करोड ८५ लाख रुपैयाँ, ओरिएन्टल इन्स्योरेन्सको १४.६२ प्रतिशतले बढेर २ अर्ब ५८ करोड ६८ लाख रुपैयाँ पुगेको छ ।

त्यसैगरि, युनाइटेड अजोड इन्स्योरेन्सको व्यवसाय १८.३१ प्रतिशतले बढेर २ अर्ब ४७ करोड ५६ लाख रुपैयाँ, सानिमा जीआईजी इन्स्योरेन्सको १२.७१ प्रतिशतले बढेर २ अर्ब ३६ करोड २८ लाख रुपैयाँ, नेपाल इन्स्योरेन्सको ७.५४ प्रतिशतले बढेर १ अर्ब ८१ करोड ५७ लाख रुपैयाँ, प्रभु इन्स्योरेन्सको ४.४० प्रतिशतले बढेर १ अर्ब ४९ करोड ७६ लाख रुपैयाँ, राष्ट्रिय बीमा कम्पनीको २.१४ प्रतिशतले बढेर १ अर्ब १८ करोड ८५ लाख रुपैयाँ र नेशनल इन्स्योरेन्सको १४.४७ प्रतिशतले बढेर १ अर्ब ६ करोड ४५ लाख रुपैयाँ पुगेको छ ।