काठमाडौं । नेपाल वैदेशिक रोजगार व्यवसायी संघमा विशेष परिस्थिति सिर्जना भएको छ । चुनावबाट आएको नेतृत्वले विचैमा राजीनामा दिए पछि अहिले संघ विशेष साधारणसभा तथा महाधिवेशनको चयारीमा जुट्नु परेको हो । संघका निर्वाचित पदाधिकारीमध्ये दुई तिहाइभन्दा बढीले सामूहिक राजीनामा दिएपछि उत्पन्न विवादलाई निकास दिन संघले आगामी जेठ २४ गते विशेष साधारणसभा तथा निर्वाचन गर्न लागेको हो ।

जिल्ला प्रशासन कार्यालय काठमाडौंको निर्देशनपछि संघको विधानको दफा २६ (४) (ख) बमोजिम सल्लाहकारहरूको रोहवरमा गठन गरिएको प्रबन्ध समितिले निर्धारित समयमै निर्वाचन सम्पन्न गर्ने प्रतिबद्धता जनाएको छ । संघको विधानमा दुई तिहाइ पदाधिकारीले राजिनामा दिएको खण्डमा विशेष साधारणसभा प्रयोजनका लागि प्रबन्ध समिति बन्ने र त्यसले २१ दिन भित्र निर्वाचन गराउनु पर्ने व्यवस्था रहेको छ । सोही अनुसार निर्वाचनलाई अघि बढाइएको निर्वतमान अध्यक्ष तथा प्रबन्ध समितिका सदस्य राजेन्द्र भण्डारीले जानकारी दिए ।

संघभित्रको लामो विवाद अन्त्य गर्दै नयाँ नेतृत्व चयनका लागि सबै व्यवसायीलाई एकताबद्ध भएर निर्वाचनमा सहभागी हुन उनले आग्रह गरे। उनले निर्वाचनलाई संघको भविष्य निर्धारण गर्ने महत्वपूर्ण अवसरका रूपमा व्याख्या गरे । भण्डारीले तोकिएकै मितिमा निर्वाचन सम्पन्न गरिने स्पष्ट पार्दै कुनै पनि बहानामा प्रक्रिया नरोकिने बताए । उनले संघलाई निकास दिन सरोकारवाला पक्षबीच निरन्तर संवाद भइरहेको जानकारी पनि दिए ।

संघका अध्यक्ष भुवनसिंह गुरुङको कार्यकालमा पदाधिकारीहरूबीचको मतभेद चर्किंदै जाँदा संघभित्रको विवाद उत्कर्षमा पुगेको थियो । त्यसपछि अधिकांश पदाधिकारीले सामूहिक राजीनामा दिएसँगै संघ नेतृत्वविहीन जस्तै अवस्थामा पुगेको हो । यसैबीच मंगलबार प्रबन्ध समितिका प्रतिनिधिसहित करिब ६० जना व्यवसायीहरूले श्रम, रोजगार तथा सामाजिक सुरक्षा मन्त्रीसँग भेटवार्ता गरी संघको वर्तमान अवस्था, निर्वाचन प्रक्रिया र व्यवसायीहरूको चासोबारे छलफल गरेका थिए ।

वर्षौंदेखि वैदेशिक रोजगार क्षेत्रको छाता संगठनको रूपमा रहेको संघमा हुन लागेको निर्वाचनलाई व्यवसायीहरूले नेतृत्व संकट समाधान गर्ने निर्णायक अवसरका रूपमा लिएका छन्। निर्वाचनसँगै संघले नयाँ नेतृत्व पाउने र लामो समयदेखिको आन्तरिक विवाद अन्त्य हुने अपेक्षा गरिएको छ ।