चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले महाधिवेशनका समयमा आमन्त्रण गरिएका विभिन्न राजनीतिक दलका अतिथिहरूमाथि भएको कमजोरीप्रति क्षमा मागेका छन् । शपथपछि महाधिवेशन समापन समारोहलाई सम्बोधन गर्दै उनले केही कमजोरीका कारण आमन्त्रित अतिथिहरूले चित्त दुखाएको विषय आएकाले त्यसमा क्षमा माग्दै पहिलो पटक गरिएको महाधिवेशन र नयाँ भएकाले भएका कमजोरी नियतवश नभएको बुझ्न आग्रह गरे ।

‘हामीले आमन्त्रण गरेका विभिन्न दलका आदरणीय पाहुनाले चित्त दुखाएको विषय पनि आएको छ, हामीले कुनै नियतवश यसो नगरेको प्रस्ट पार्न चाहन्छु र त्यसपछि क्षमा चाहन्छु, आगामी दिनमा सबैको अस्तित्व स्वीकार गर्ने, सबैलाई सम्मान गरेर जाने विषयमा कुनै शङ्का गर्नुपर्दैन’, उनले भने ।

लामिछानेले घुमाउरो शैलीले पार्टीका नेता तथा सांसदहरूलाई आफ्नो अभिव्यक्तिमा विशेष ध्यान दिन निर्देशन नै गरेका थिए । ‘अब हामीलाई अध्ययन नगरी बोल्ने छुट छैन । धेरै परिपक्व भइसकेका छौँ । जिम्मेवारी धेरै छन् । सानो अभिव्यक्तिले ठूलो विवाद आउन सक्छ, सबैले विशेष ख्याल गर्नुहोला’, उनले भने ।