काठमाडौं । लुम्बिनी विकास बैंक लिमिटेडको नाफामा उल्लेख्य सुधार देखिएको छ । बैंकले सार्वजनिक गरेको गत आवको अन्तिम त्रैमासिकसम्मको अपरिष्कृत वित्तीय विवरण अनुसार नाफामा उछाल देखिएको हो ।

सार्वजनिक विवरणअनुसार गत आवमा नाफा, वितरणयोग्य मुनाफा सहित अधिकांश वित्तीय सूचकमा उच्च सुधार देखिएको छ । गत आर्थिक वर्षको अन्तिसम्ममा बैंकले ८५ करोड १० लाख रुपैयाँ खुद नाफा कमाएको छ । यो अघिल्लो आवको सोही अवधिको तुलनामा २५२.९६ प्रतिशतले धेरै हो । अघिल्लो आर्थिक वर्षमा यो बैंकको खुद नाफा २४ करोड ११ लाख रुपैयाँ रहेको थियो । त्यस्तै समीक्षा अवधिमा बैंकको खुद ब्याज आम्दानी १ अर्ब ९९ करोड ७२ लाख रुपैयाँ पुगेको छ । अघिल्लो वर्ष यस्तो आम्दानी १ अर्ब ८५ करोड ७३ लाख रुपैयाँ रहेको थियो । सोही अवधिमा बैंकको खुद फी तथा कमिसन आम्दानी भने २० करोड ६० लाख रुपैयाँबाट १८ करोड ४३ लाख रुपैयाँमा झरेको छ । यद्यपि बैंकको कुल सञ्चालन आम्दानी २ अर्ब १५ करोड रुपैयाँबाट २ अर्ब २८ करोड रुपैयाँ नाघेको छ भने सञ्चालन मुनाफा ५८ करोड ७० लाख रुपैयाँबाट १०८.५० प्रतिशतले बढेर १ अर्ब २१ करोड ७८ लाख रुपैयाँ पुगेको छ ।

समीक्षा अवधिमा बैंकको वितरणयोग्य मुनाफामा पनि सुधार देखिएको छ । गत आवमा बैंकको वितरणयोग्य मुनाफा ६१ करोड ५५ लाख रुपैयाँ पुगेको छ । जुन अघिल्लो आर्थिक वर्षको तुलनामा २३३.८९ प्रतिशतले धेरै हो । अघिल्लो आवमा यस्तो मुनाफा १८ करोड ४३ लाख रुपैयाँ रहेको थियो ।  समीक्षा अवधिमा बैंकको प्रतिसेयर आम्दानी २३.४८ रुपैयाँ पुगेको छ भने प्रतिसेयर नेटवर्थ २१३.७३ रुपैयाँ रहेको छ । बैंकको खराब कर्जा ४.७१ प्रतिशतबाट बढेर ६.९४ प्रतिशत पुगेको छ भने आधारदर ५.४८ प्रतिशत रहेको छ । चुक्ता पूँजी ३ अर्ब ६२ करोड ३६ लाख रुपैयाँ रहेको बैंकको रिजर्भ कोषमा ३ अर्ब ५० करोड ५५ लाख रुपैयाँ सञ्चिति रहेको छ ।