काठमाडौं । आईएमई लाइफ इन्स्योरेन्स कम्पनी लिमिटेडको नाफामा सामान्य सुधार देखिएको छ । कम्पनीले सार्वजनिक गरेको गत आर्थिक वर्ष २०८२/८३ को चौथो त्रैमासिकसम्मको अपरिष्कृत वित्तीय विवरण अनुसार नाफा सहित अन्य सुचकमा पनि चमक देखिएको हो ।

कम्पनीले गत आर्थिक वर्षको असार मसान्तसम्मको अवधिमा ५८ करोड ४२ लाख रुपैयाँ नाफा आर्जन गरेको छ । यो अघिल्लो आर्थिक वर्षको तुलनामा ०.१६ प्रतिशतले बढी हो । कम्पनीले अघिल्लो आर्थिक वर्षको असार मसान्तसम्म ५८ करोड ३३ लाख रुपैयाँ नाफा कमाएको थियो । समीक्षा अवधिमा कम्पनीको जीवन बीमा कोषको आकार भने उच्च वृद्धि भएको छ । गत आवको अन्तिमसम्ममा कम्पनीको जीवन बीमा कोष १८ अर्ब २८ करोड माथि पुगेको छ । जुन अघिल्लो आर्थिक वर्षको तुलनामा ३९.४० प्रतिशतले धेरै हो । कम्पनीको यस्तो कोषको आकार अघिल्लो वर्ष १३ अर्ब १० करोड ९० लाख रुपैयाँ रहेको थियो ।

समीक्षा अवधिमा कम्पनीको व्यवसाय विस्तारको मुख्य सूचक खुद बीमा शुल्क आर्जनमा पनि ३५.८२ प्रतिशतले बढेको छ । कम्पनीले गत आवमा ७ अर्ब ४६ करोड बढीको बीमा शुल्क संकलन गरेको छ । अघिल्लो वर्ष ५ अर्ब ४९ करोड रुपैयाँ बीमा शुल्क संकलन गरेको थियो । समीक्षा अवधिमा कम्पनीको कुल खर्च २८.८८ प्रतिशतले बढेर ८ अर्ब ४६ करोड ३० लाख रुपैयाँ पुगेको छ भने कुल दाबी भुक्तानी पनि १४.२० प्रतिशतले वृद्धि भई १ अर्ब ४६ करोड ५९ लाख रुपैयाँ कायम भएको छ । ५ अर्ब रुपैयाँ चुक्ता पुँजी रहेको कम्पनीको प्रतिसेयर आम्दानी ११ रुपैयाँ ६८ पैसा र प्रतिसेयर नेटवर्थ १३५ रुपैयाँ ६६ पैसा रहेको छ । कम्पनीको सोल्भेन्सी मार्जिन अनुपात २.२२ प्रतिशतबाट २.५९ प्रतिशत कायम भएको छ ।