काठमाडौं । प्रमुख प्रतिपक्षी दल नेपाली कांग्रेसले सेयर बजारको समस्या समाधानका लागि विज्ञहरूसँग परामर्श थालेको छ । कांग्रेस सभापति गगन थापाले पार्टीभित्र र संसदमा आर्थिक मुद्दाहरूलाई प्रभावकारी रूपमा उठाउनका लागि कर्मचारी र सांसदहरूलाई आर्थिक रूपमा साक्षर बनाउन परामर्श थालिएको बताएका हुन् ।

त्यसै अनुरूप कांग्रेसले आइतबार सुवर्ण शमशेर इकोनोमिक सिरिजको तेस्रो शृङ्खलामा सेयर बजारबारे विज्ञहरूलाई बोलाएर छलफल गरेको छ । छलफलको सुरुवात गर्दै सभापति थापाले सेयर बजारको वर्तमान अवस्था र यसका चुनौतीहरूबारे पार्टीले गम्भीरतापूर्वक छलफल सुरु गरेको बताए । मुलुकमा निर्वाचन सम्पन्न भएपछि सेयर बजारले उत्साहजनक गति लिने धेरैको अनुमान र अपेक्षा रहे पनि व्यवहारमा त्यस्तो हुन नसकेको थापाले स्वीकार गरे ।  ‘निर्वाचन पछाडि सेयर बजार अत्यन्त राम्रोसँग अगाडि जाला भन्ने अनुमान थियो, तर दुर्भाग्यवश जसरी जानुपर्ने हो, त्यसरी जान सकिरहेको छैन,’ थापाले भने । थापाले यसका कारणहरू, अप्ठ्याराहरू र तत्काल गर्नुपर्ने सुधारका बारेमा विज्ञहरूसँग सुझाव मागिएको जानकारी दिए ।

कार्यक्रममा प्रस्तुत गरिएका विषयवस्तुहरू र विज्ञका सुझावहरूलाई कांग्रेसको विज्ञ टोलीले संकलन गर्ने थापाको भनाइ थियो । सुझावहरूको आधारमा एउटा प्रतिवेदन तयार पारिने र त्यो प्रतिवेदन पार्टीका सांसदहरूलाई उपलब्ध गराइने थापाको भनाइ छ । ‘हाम्रा सांसदहरूले संसदमा कुरा उठाउँदा तथ्यमा आधारित भएर उठाउन सकुन् भनेर हामीले यो गृहकार्य गरेका हौँ,’ सभापति थापाले भने । डा.गोविन्द पोखरेलले संयोजन गरेको कार्यक्रममा अर्थशास्त्रीहरू, पुँजी बजारका विज्ञ र पार्टीका नेताहरूको सहभागिता थियो ।