काठमाडौं । सुपर मादी हाइड्रोपावर लिमिटेडले वार्षिक साधारणसभा बोलाएको छ । कम्पनीले आफ्ना सेयरधनीहरुका लागि घोषणा गरेको लाभांश प्रस्ताव सहितका प्रस्ताव पारित गर्नका लागि १७ र्औँ वार्षिक साधारणसभा बोलाएको हो ।

कम्पनीले आगामी असोज १ गते काठमाडौंको बत्तीसपुतलीस्थित होटल इम्पेरियलमा बिहान ११ बजे १७ औं वार्षिक साधारणसभा बोलाएको छ । सभामा आर्थिक वर्ष २०८२/८३ को वार्षिक प्रतिवेदन, लेखापरीक्षकको प्रतिवेदनसहितको वित्तीय विवरण र आगामी आर्थिक वर्षका लागि लेखापरीक्षक नियुक्तिलगायतका विषयमा छलफल हुनेछ ।

सञ्चालक समितिले हाल कायम चुक्ता पूँजीको १५ प्रतिशत बोनस सेयर वितरण गर्ने प्रस्ताव सभामा लैजानेछ । कम्पनीको हालको चुक्ता पूँजी २ अर्ब ३१ करोड ५२ लाख ५० हजार रुपैयाँ रहेको छ । यसअनुसार ३४ लाख ७२ हजार ८७५ कित्ता बोनस सेयर वितरण गरिनेछ । बोनस सेयर वितरणपछि कम्पनीको चुक्ता पूँजी २ अर्ब ६६ करोड २५ लाख ३७ हजार ५०० रुपैयाँ पुग्नेछ । त्यसपछि कम्पनीले सोही चुक्ता पूँजीको २ः१ अनुपातमा हकप्रद सेयर निष्कासन गर्ने प्रस्ताव गरेको छ । प्रस्तावअनुसार १ करोड ३३ लाख १२ हजार ६८८ कित्ता हकप्रद सेयर निष्कासन गरिनेछ ।

कम्पनीले बोनस सेयर र हकप्रद निष्कासनपछि आफ्नो अधिकृत, जारी तथा चुक्ता पूँजीसमेत वृद्धि गर्ने प्रस्ताव गरेको छ । प्रस्तावअनुसार अधिकृत र जारी पूँजी ३ अर्ब ९९ करोड ३८ लाख ६ हजार ३०० रुपैयाँ तथा चुक्ता पूँजी २ अर्ब ६६ करोड २५ लाख ३७ हजार ५०० रुपैयाँ कायम गरिनेछ । त्यस्तै कम्पनीले आर्थिक वर्ष २०८२/८३ का लागि कर प्रयोजनका लागि चुक्ता पूँजीको ०.७८९४७ प्रतिशत अर्थात् करिब १ करोड ८२ लाख ७८ हजार २८९ रुपैयाँ नगद लाभांश वितरण गर्ने प्रस्ताव पनि गरेको छ ।

साधारणसभा तथा बोनस सेयर वितरणका लागि कम्पनीले भदौ २३ गते सेयरधनी दर्ता किताब बन्द गर्ने जनाएको छ । त्यसैले भदौ २२ गतेसम्म नेपाल स्टक एक्सचेन्जमा सेयर कारोबार गरी आफ्नो नाममा सेयर कायम भएका सेयरधनीले साधारणसभामा सहभागी हुन तथा बोनस शेयर प्राप्त गर्न योग्य हुनेछन् ।