रसुवामा आएको विनाशकारी बाढीबाट प्रभावित नागरिकको राहत तथा उद्धारका लागि अमेरिकामा रहेका मुगुमबासीले १२ लाख रुपैयाँ सहयोग गरेका छन् ।

युनाइटेड मुगुम अर्गनाइजेसन, अमेरिकामार्फत उक्त रकम प्रधानमन्त्री राहत कोषमा हस्तान्तरण गरिएको हो । अमेरिकामा बसोबास गर्दै आएका मुगुमबासीले आपसमा रकम संकलन गरी बाढीपीडितलाई सहयोग गरेका हुन् ।

बाढीबाट प्रभावित परिवारलाई राहत उपलब्ध गराउने तथा विपद्का कारण समस्यामा परेका नागरिकको पुनःस्थापनामा सहयोग पुर्‍याउने उद्देश्यले रकम प्रदान गरिएको जनाइएको छ ।

Screenshot

रसुवामा आएको विनाशकारी बाढीले जनधनमा क्षति पुर्‍याउनुका साथै स्थानीय नागरिकको जनजीवन प्रभावित बनाएको थियो । बाढीपीडितलाई राहत तथा पुनःस्थापनाका लागि विभिन्न संघसंस्था, समुदाय र सहयोगी दाताबाट आर्थिक तथा भौतिक सहयोग जुट्ने क्रम जारी छ । विदेशमा रहेका नेपाली समुदायले समेत विपद्का बेला सहयोग जुटाएर मानवीय सहकार्य र सामाजिक उत्तरदायित्व प्रदर्शन गरिरहेका छन् ।