काठमाडौं । बडादशैँका बेला सर्वसाधारणको आवतजावत सहज बनाउन सशस्त्र प्रहरी बल, नेपालले काठमाडौं उपत्यकामा तीन दिनका लागि निःशुल्क बस सेवा सञ्चालन गरेको छ । चाडपर्वमा सार्वजनिक यातायातको चाप र यात्रुको असुविधालाई ध्यानमा राख्दै आजदेखि दुईवटा बस सञ्चालनमा ल्याइएको हो ।

सशस्त्र प्रहरी बलका अनुसार दुवै बस बिहान ८ बजेदेखि बेलुका ६ बजेसम्म सञ्चालन हुनेछन् । पहिलो बस प्रधान कार्यालयबाट बालाजु, नयाँ बसपार्क, कोटेश्वर, सातदोबाटो, बल्खु, कलंकी र स्वयम्भू हुँदै चक्रपथ परिक्रमा गर्नेछ ।

त्यस्तै दोस्रो बस प्रधान कार्यालयबाट सीतापाइला हुँदै कलंकी, बल्खु, कोटेश्वर, महाराजगञ्ज, नयाँ बसपार्क र बालाजु भएर सञ्चालन हुनेछ ।

दशैँ मनाउन घर जाने तथा उपत्यकामै रहेका सर्वसाधारणलाई सार्वजनिक यातायातको सहज विकल्प उपलब्ध गराउने उद्देश्यले सेवा सुरु गरिएको हो । निःशुल्क बस सेवाबाट यात्रुलाई चाडपर्वका बेला आवतजावत गर्न सहज हुने अपेक्षा गरिएको छ ।