काठमाडौं । विश्वप्रसिद्ध लुक्ला विमानस्थल रहेको सोलुखुम्बुको लुक्ला बजारमा पहिलोपटक सडकमार्ग हुँदै निर्माण कम्पनीको गाडी पुगेको छ। खुम्बु पासाङ ल्हामु गाउँपालिका क्षेत्रमा सडक पहुँच विस्तार गर्ने क्रममा गाडी लुक्ला बसपार्कसम्म पुग्नुलाई महत्त्वपूर्ण उपलब्धिका रूपमा हेरिएको छ।

रिकोट ब्रदर्श जेभी निर्माण कम्पनीले दशैँअघि नै लुक्लासम्म सडक पुर्‍याउने प्रतिबद्धताअनुसार गाडी बसपार्कसम्म पुर्‍याउन सफल भएको हो। यससँगै पर्यटकीय दृष्टिले विश्वमै परिचित खुम्बु क्षेत्रमा सडक यातायात विस्तारको नयाँ ढोका खुलेको छ।

निर्माण कम्पनीका अनुसार आवश्यक व्यवस्थापन तथा आन्तरिक तयारी पूरा भएपछि अन्य सवारीसाधनसमेत व्यावसायिक रूपमा सञ्चालन गर्न मिल्ने गरी सडक खुला गर्ने तयारी भइरहेको छ।

सडक पहुँच विस्तार भएपछि खुम्बु क्षेत्रमा निर्माण सामग्री ढुवानी, स्थानीयको आवागमन तथा पर्यटन प्रवर्द्धनमा सहजता आउने अपेक्षा गरिएको छ। हालसम्म हवाई यातायातमा निर्भर लुक्ला क्षेत्रमा सडक पुग्नु स्थानीय पूर्वाधार विकासका दृष्टिले पनि महत्त्वपूर्ण कदम मानिएको छ।

Information by : Solu Update Fb Page