भुटानका राजा जिग्मे खेसर नाम्ग्याल वाङ्चुक र रानी ग्याल्त्सुएनले थिम्पुस्थित देवी पञ्चायन मन्दिरमा हिन्दू समुदायसँगै दसैँ मनाएका छन् । उनीहरूले मन्दिरमा पूजाआजा गर्नुका साथै उपस्थित सर्वसाधारणलाई दसैँको टीका र आशीर्वाद प्रदान गरेका हुन् ।

यसअघि गत अक्टोबर १७ मा पनि राजारानीले शाही दसैँ टीकाको विशेष पूजा गरी आशीर्वाद प्रदान गरेका थिए । त्यसबेला राजपरिवारबाट आशीर्वाद प्राप्त टीका भुटानका २० वटै जिल्लामा दसैँ मनाउने परिवारलाई वितरण गर्न पठाइएको थियो ।

भुटानमा हिन्दू समुदायले दसैँलाई महत्त्वपूर्ण पर्वका रूपमा मनाउँछन् । यस अवसरमा परिवारका सदस्य एकत्रित भएर ज्येष्ठ व्यक्तिबाट टीका र आशीर्वाद ग्रहण गर्ने परम्परा छ ।

रामायणमा वर्णन गरिएका रामको विजयको सम्झनामा मनाइने दसैँले धर्मको अधर्ममाथिको विजयको सन्देश दिने विश्वास गरिन्छ ।

राजारानी र सर्वसाधारण एकै ठाउँमा भेला भएर पर्व मनाउनुलाई भुटानमा राजसंस्था र जनताबीचको आत्मीय सम्बन्धको प्रतीकका रूपमा हेरिएको छ । यसले राजा, रानी र जनतालाई एउटै परिवारका सदस्यका रूपमा जोड्ने सांस्कृतिक तथा धार्मिक परम्परालाई प्रतिबिम्बित गरेको छ ।