काठमाडौं । प्रधानमन्त्री कप पुरुष राष्ट्रिय क्रिकेट प्रतियोगिता–२०२५ का सबै खेल उपत्यका बाहिर हुने भएका छन् । नेपाल क्रिकेट संघ (क्यान)ले शुक्रबार प्रतियोगिताको खेल तालिका सार्वजनिक गर्दै सबै खेल उपत्यका बाहिर हुने जानकारी गराएको हो ।

प्रधानमन्त्री कपका खेलहरु भैरहवामा रहेका सिद्धार्थ रंगशाला, एक्ट्राटेक ओभल र दाङको लमही क्रिकेट मैदानमा आयोजना हुने छन् । प्रतियोगिता फागुन २५ देखि चैत १६ गतेसम्म सञ्चालन हुनेछ । तालिकाअनुसार प्रतियोगिताको पहिलो दिन तीन खेल हुनेछन् । पहिलो दिन सिद्धार्थ रंगशालामा कोशी प्रदेश र लुम्बिनी प्रदेशबीच प्रतिस्पर्धा हुनेछ । यस्तै, एक्स्ट्राटेकमा वाग्मती प्रदेशले एपीएफको सामना गर्दा लमहीमा कर्णालीले सुदूरपश्चिम प्रदेशविरुद्ध खेल्ने छ ।

प्रतियोगिताको फाइनल खेल चैत १६ गते सिद्धार्थ रंगशालामा हुने क्यानले जनाएको छ । प्रतियोगितामा सात प्रदेशसँगै तीन विभागीयसहित कुल १० टोलीले सहभागिता जनाउने छन् ।