काठमाडौं । अस्ट्रेलियाले वेस्ट इण्डिजविरुद्धको पाँच खेलको टि ट्वान्टी आई सिरिज क्लिन स्विप गरेको छ । मंगलवार बिहान सम्पन्न पाँचौ खेलमा तीन विकेटको जित निकालेको अस्ट्रेलियाले सिरिज क्लिन स्विप गरेको हो । अस्ट्रेलियाले यस अघि भएका चारै खेल पनि जितेको थियो ।

१ सय ७१ रनको लक्ष्य अस्ट्रेलियाले १७ ओभरमा ७ विकेट गुमाएर पूरा गर्यो । अस्ट्रेलियाको जितमा मिचेल ओविन १७ बलमा ३ चौका र ३ छक्काको सहयोगमा सर्वाधिक ३७ रन बनाउँदै आउट भए । क्यामरुन ग्रिन १८ बलमा ५ चौकाको सहयोगमा ३२ रनमा आउट भए । टिम डेबिड १२ बलमा ३०, कप्तान मिचेल मार्श ८ बलमा १४ तथा जोस इङ्ग्लिस ५ बलमा १० रनमा आउट भए । आरोन हार्डी २५ बलमा २ चौका र १ छक्काको सहयोगमा २८ रनमा अविजित रहे । वेस्ट इण्डिजका लागि अकिल होसेनले ३ तथा अल्जारी जोसेफ र जेसन होल्डरले समान २ विकेट लिए ।

त्यसअघि वार्नर पार्कमा टस हारेर पहिले ब्याटिङ गरेको वेस्ट इण्डिजले १९.४ ओभरमा सबै विकेट गुमाएर १ सय ७० रनको योगफल तयार गरेको थियो । वेस्ट इण्डिजका लागि शिमरन हिटमायरले ३१ बलमा ३ चौका र ३ छक्काको सहयोगमा सर्वाधिक ५२ रनको अर्धशतकीय इनिङ खेले । शरफन रादरफार्ड १७ बलमा ६ चौका र १ छक्काको सहयोगमा ३५ रनमा आउट भए ।

जेसन होल्डर २०, म्याथ्यु फोर्ड १५ तथा अकिल होसेन र ब्राण्डन किंग समान ११ रनमा आउट भए । अस्ट्रेलियाका लागि बेन ड्वाशुसले ३, नाथन एलिसले २ तथा आरोन हार्डी, सन एबट, ग्लेन म्याक्सवेल र एडम जाम्पाले समान १ विकेट लिए । टि ट्वान्टी आई सिरिज अघि भएको तीन खेलको टेस्ट सिरिज पनि अस्ट्रेलियाले क्लिन स्विप गरेको थियो ।