टोरन्टो । क्रिकेट क्यानाडाले अनुभवी भारतीय कोच मोन्टी देसाईलाई पुरुष राष्ट्रिय टोलीको अन्तरिम हेड कोच नियुक्त गरेको छ । उनी नेपाली राष्ट्रिय टीमका पूर्वप्रशिक्षक हुन् ।

आईसीसी क्रिकेट विश्वकप लिग-२ अन्तर्गतका महत्वपूर्ण खेलहरूको लागि उनलाई नियुक्त गरिएको हो । देसाईले इनग्लेटन लिबर्डको स्थान लिँदै टिमको जिम्मेवारी सम्हाल्नेछन् । लिबर्डले हालै भारत र श्रीलंकामा सम्पन्न टी–२० विश्वकपमा क्यानाडा टिमको प्रशिक्षण गरेका थिए ।

मुम्बईका मोन्टी देसाई क्यानाडा क्रिकेटसँग अपरिचित भने होइनन् । सन् २०१९ मा पनि उनले क्यानाडा टिमको हेड कोचको रूपमा काम गरिसकेका छन् । त्यसपछि उनले वेस्ट इन्डिज टेस्ट टिममा ब्याटिङ कोचको भूमिका निर्वाह गरेका थिए ।

उनले नेपाल राष्ट्रिय क्रिकेट टिमको हेड कोचको रूपमा पनि सफलतापूर्वक काम गरेका थिए र आईपीएल टीम राजस्थान रोयल्स तथा गुजरात लायन्ससँग पनि जोडिएका छन् । नेपाल प्रिमियर लिगमा उनी काठमाण्डु गुर्खाजको प्रमुख प्रशिक्षक बनेका थिए ।