काठमाडौं । अमेरिकी राष्ट्रपति डोनाल्ड ट्रम्प आइतबार न्यूयोर्कमा हुने यूएस ओपन पुरुष सिंगल्स फाइनलमा उपस्थित हुने भएका छन्। उनले आर्थर एश स्टेडियममा रहेको स्विस घडी ब्रान्ड रोलेक्सको लग्जरी स्वीटबाट खेल अवलोकन गर्ने तयारी भएको अन्तर्राष्ट्रिय समाचार एजेन्सीहरूले जनाएका छन्।

यो ट्रम्पको सन् २०१५ यता पहिलोपटक यूएस ओपन भ्रमण हुने हो। उनी राजनीतिक यात्रामा होमिनु अघि न्यूयोर्कमा बस्दादेखि नै यूएस ओपनको नियमित दर्शक रहँदै आएका थिए। अहिले भने उनी मुख्यतः फ्लोरिडास्थित आफ्नो निवास मार-ए-लागोमा बस्छन्।

स्विस सामानमा ३९ प्रतिशत शुल्कपछि रोलेक्स स्वीट

ट्रम्पको रोलेक्स स्वीट स्वीकृति विशेष मानिएको छ, किनभने केही साताअघि मात्र अमेरिकी प्रशासनले स्विस उत्पादनमा ३९ प्रतिशत शुल्क तोकेको थियो। यो शुल्क युरोपेली संघका सामानमा तोकिएको भन्दा दुई गुना बढी र बेलायतबाट आउने सामानभन्दा करिब चार गुना बढी हो। यसले स्विट्जरल्याण्डलाई छिमेकी युरोपेली संघसँग प्रतिस्पर्धा गर्न गाह्रो बनाइदिएको भन्दै चर्चा भएको छ।

ट्रम्प यसअघि सुपर बाउल, डाइटोना ५००, यूएफसी लडाइँ, एनसीएए रेसलिङ च्याम्पियनसिप र फिफा क्लब वर्ल्ड कप फाइनलजस्ता ठूला खेलकुद प्रतियोगितामा उपस्थित भइसकेका छन्। यूएस ओपनमा भने २००० मा तत्कालीन राष्ट्रपति बिल क्लिन्टनपछि कुनै अमेरिकी राष्ट्रपति प्रत्यक्ष उपस्थित हुने ट्रम्प पहिलो हुन्।

फाइनलमा विश्व नम्बर १ जानिक सिनर र नम्बर २ कार्लोस अल्काराज भिड्दै छन्। सेमिफाइनलमा नोभाक जोकोभिचलाई हराएका अल्काराजले ट्रम्पको उपस्थिति “टेनिसका लागि सकारात्मक कुरा” भएको बताए। उनले भने, “राष्ट्रप्रमुख उपस्थित हुनु खेलको प्रतिष्ठाका लागि ठूलो कुरा हो। तर म आफ्नो खेलमा ध्यान केन्द्रित गर्ने प्रयास गर्छु।”