काठमाडौं । हिमालयन एभरेस्ट इन्स्योरेन्स लिमिटेडले गत भदौ २३ र २४ गतेको जेनजी आन्दोलनका क्रममा क्षति पुगेका सम्पत्तिहरुको बीमा दाबी भुक्तानी गर्ने प्रक्रिया अघि बढाएको छ । कम्पनीका अनुसार हालसम्म दाबी गरिएका २८७ वटा बीमा दाबीमध्ये २४५ वटा दाबी बापत कुल २१ करोड ७४ लाख ४५ हजार ८३१ रुपैयाँ भुक्तानी भइसकेको हो ।

बाँकी दाबीको भुक्तानी प्रक्रिया पनि उच्च प्राथमिकताका साथ अघि बढाइएको कम्पनीले जनाएको छ । कम्पनीले भुक्तानी कार्य असोज २१ गते मंगलबारबाट पुनः यथावत रूपमा सुरु हुने जनाएको छ । विषम परिस्थितिमा बीमित ग्राहकको सुविधा र राहतका लागि शीघ्र भुक्तानी प्रक्रिया अघि बढाइएको कम्पनीको भनाइ छ ।

यस्तै, बाँकी बीमितले क्षतिपूर्तिको दावी भुक्तानीका लागि आवश्यक कागजात पूरा गरी नजिकको शाखा वा केन्द्रीय कार्यालयमा सम्पर्क गर्न आग्रह गरिएको छ ।