काठमाडौं । इशान किशन र सूर्यकुमार यादवले अर्धशतक बनाएपछि भारतले न्युजिल्यान्डलाई ७ विकेटले हराउँदै टि ट्वान्टी आई सिरिजमा २–० को अग्रता लिएको छ । रायपुरमा जितका लागि २०९ रनको लक्ष्य भारतले १५.२ ओभरमै ३ विकेट गुमाउँदै पूरा गर्‍यो ।

भारतको सुरुआत निकै खराब रह्यो । पहिलो सात बलमै सन्जु स्यामसन (६) र अभिषेक शर्मा (०) आउट भए । तर त्यसपछि इशान र सूर्यकुमारले शानदार ब्याटिङ गर्दै खेल भारतको पक्षमा फर्काए। इशानले २१ बलमै अर्धशतक पूरा गरे । उनले ३२ बलमा ११ चौका र ४ छक्कासहित ७६ रन बनाए ।

इशानले पावरप्लेमा नै न्युजिल्यान्डका बलरहरूमाथि आक्रामक प्रहार गरे । सूर्यकुमारले पनि उत्कृष्ट फर्म देखाउँदै अविजित ८२ रन बनाए । लामो समयपछि उनले टि ट्वान्टी आईमा अर्धशतक पूरा गरेका हुन् । सूर्यकुमारले शिवम दुबेसँग चौथो विकेटका लागि ८१ रनको नटआउट साझेदारी गरे । शिवमले ३६ रन जोडे । न्युजिल्यान्डका लागि म्याट हेन्री, ज्याकब डफी र इश सोदीले समान १ विकेट लिए ।

त्यसअघि न्युजिल्यान्डले पहिले ब्याटिङ गर्दै २० ओभरमा २०८ रन बनाएको थियो । डेभोन कन्वे (१९ रन ) र टिम सेइफर्ट (२४ रन) ले राम्रो सुरुआत दिलाए । भारतका बलरहरूले बीच–बीचमा विकेट लिँदै दबाब बनाएका थिए । रचिन रवीन्द्र (४४ रन ) र मिचेल स्यान्टनर (४७ रन) ले अन्त्यतिर राम्रो रन जोडे पछि टोलिले विशाल योगफल बनाएको थियो । भारतका कुलदीप यादवले २ विकेट लिए । ५ मध्येको तेस्रो खेल आइतवार गुवाहाटीमा हुनेछ ।