काठमाडौं । टी–२० विश्वकप अन्तर्गत आफ्नो अन्तिम खेलमा नेपाल विजयी भएको छ । सान्त्वना जित निकाल्ने क्रममा नेपालले स्कटल्यान्डलाई ७ विकेटले पराजित गरेको हो ।

स्कटल्यान्डले दिएको १७१ रनको लक्ष्य नेपाले १९.२ ओभरमा ३ विकेट गुमाएर पुरा गरेको हो । नेपालका लागि दीपेन्द्र सिंह ऐरिले सर्वाधिक ५० रनको योगदान दिए । त्यस्तै कुशल भुर्तेलले ४३ रन बनाए भने आसिफ शेखले ३३ रनको पारी खेले । गुल्सन झाले २४ रनको योगदान दिए भने कप्तान रोहित पौडेलले १६ रन बनाए ।

यस अघि मुम्बईस्थित वानखेडे मैदानमा टस हारेर पहिले ब्याटिङ गरेको स्कटल्यान्डले १७० रन बनाएको थियो । स्कटल्यान्डले २० ओभरमा ७ विकेटको क्षतिमा १७० रन जोड्यो । उसका लागि माइकल जोन्सले ७१ रन जोडे । जर्ज मुन्सीले २७, ब्रेन्डन म्याकमुलनले २५ रन बनाए । बलिङतर्फ नेपालका सोमपाल कामीले सर्वाधिक तीन विकेट लिए । नन्दन यादवले दुई तथा रोहित पौडेल र कुशल भुर्तेलले एक–एक विकेट लिए ।