काठमाडौं । नेपाली बजारमा पछिल्लो समय सुनको मूल्य घट्ने क्रम जारी रहेको छ । एक हप्ताको अवधिमा सुनको मूल्यमा ठूलो गिरावट भएको हो ।

नेपाल सुनचाँदी व्यवसायी महासंघका अनुसार एक साताको अवधिमा सुनको मूल्य प्रतितोला १३ हजार ५०० रुपैयाँले घटेको हो । गत चैत ६ गते शुक्रबार नेपाली बजारमा सुन प्रतितोला २ लाख ९४ हजार ५०० रुपैयाँमा कारोबार भएको थियो । तर, एक हप्ताको अवधिमा सुनको मूल्यमा भारी गिरावट भएर प्रतितोला २ लाख ८१ हजार रुपैयाँमा झरेर कारोबार भएको छ ।

यो साता अधिकांश दिन सुनको मूल्य घटेको छ । चैत ८ गते आइतबार नेपाली बजारमा सुन प्रतितोला २ लाख ८२ हजार रुपैयाँमा कारोबार भएको थियो । त्यसैगरी चैत ९ गते सोमबार २ लाख ८२ हजार ५०० रुपैयाँ पुगेको सुनको मूल्य मंगलबार १० गते उल्लेख्य घटेर २ लाख ७३ हजार ९०० रुपैयाँमा झरेको थियो ।

चैत ११ गते बुधबार भने सुनको मूल्यमा बढोत्ती भएको थियो । सो दिन सुन प्रतितोला २ लाख ८८ हजार ५०० रुपैयाँमा कारोबार भएको थियो । बुधबार बढेको सुनको मूल्य बिहीबार फेरि घट्यो । बिहीबारको बजारमा सुनको मूल्य प्रतितोला २ हजार ९०० रुपैयाँले घटेर २ लाख ८५ हजार ६०० रुपैयाँमा झर्यो । साताको अन्तिम दिन चैत १३ गते, शुक्रबार नेपालीबजारमा सुनको मूल्य प्रतितोला २ लाख ८१ हजार रुपैयाँमा कारोबार भएको थियो ।