रूपन्देही । आफूलाई केन्द्रीय अनुसन्धान ब्यूरो (सीबिआई) को डीएसपी भन्दै ठगी गर्ने एक जनालाई पाल्पा प्रहरीले पक्राउ गरेको छ । जिल्ला प्रहरी कार्यालय पाल्पाले गुल्मीको रूरू गाउँपालिका–२, ग्वादी घर भएका अन्दाजी २७ वर्षिय रिजन भनिने राजेश विश्वकर्मालाई नियन्त्रणमा लिएको हो ।

प्रहरीका अनुसार विश्वकर्माले विदेश पठाउने क्रममा रकम अड्किएकी एक महिलालाई आफू सीआईबीको डीएसपी भएको बताउँदै रकम फिर्ता गराइदिने आश्वासन दिएका थिए । सोही विश्वासमा पारेर उनले गत मंसिर महिनामा ती महिलाबाट १ लाख ७० हजार रुपैयाँ लिएका थिए ।

रकम लिँदा उनले आफ्ना छोरालाई अध्ययनका लागि बेलायत पठाउन पैँसा अपुग भएको र तलब आएपछि फिर्ता गर्ने बताएका थिए । तर रकम लिएपछि उनले ती महिलालाई सामाजिक सञ्जाल र मोबाइलमा समेत ब्लक गरेका थिए ।

पीडित महिलाले गत मंगलबार जिल्ला प्रहरी कार्यालय पाल्पामा निवेदन दिएपछि प्रहरीले अनुसन्धान अघि बढाएको थियो । अनुसन्धानकै क्रममा विश्वकर्मालाई बिहीबार दिउँसो करिब ४ बजे तानसेन नगरपालिका–१४, अर्गलीबाट पक्राउ गरिएको छ । पक्राउ परेका विश्वकर्मामाथि ठगी मुद्दामा अनुसन्धान गर्न जिल्ला अदालतबाट १० दिनको म्याद थप गरिएको छ । घटनाबारे थप अनुसन्धान भइरहेको जिल्ला प्रहरी कार्यालय पाल्पाका सूचना अधिकारी होमप्रकाश चौधरीले जानकारी दिएका छन् ।