काठमाडौं । सानिमा जिआईसी इन्स्योरेन्स लिमिटेडले प्रस्ताव गरेको लाभांश प्राप्त गर्न चाहने लगानीकर्ताका लागि आज वैशाख २२ गते अन्तिम दिन रहेको छ । कम्पनीले साधारणसभा प्रयोजनका लागि वैशाख २३ गतेदेखि नामावली बन्द गर्ने निर्णय गरेकाले आजसम्म कायम रहेका सेयरधनीले मात्रै लाभांश प्राप्त गर्न तथा साधारणसभामा सहभागी हुन पाउनेछन् ।

कम्पनीले आगामी जेठ ६ गते वार्षिक साधारणसभा आह्वान गरेको छ । उक्त सभामा आर्थिक वर्ष २०८१/८२ को नाफाबाट सेयरधनीलाई वितरण गर्ने लाभांश प्रस्ताव पेश गरिनेछ । कम्पनीले हाल कायम चुक्ता पुँजीको ५ प्रतिशत बोनस सेयर र कर प्रयोजनका लागि ०.२६३२ प्रतिशत नगद लाभांश वितरण गर्ने प्रस्ताव गरेको छ । यसअनुसार सेयरधनीले कुल ५.२६३२ प्रतिशत लाभांश प्राप्त गर्नेछन् ।

प्रस्तावित लाभांश साधारणसभाबाट अनुमोदन भएपछि मात्रै लगानीकर्तामा वितरण गरिने कम्पनीले जनाएको छ । हाल सानिमा जिआईसी इन्स्योरेन्सको चुक्ता पुँजी २ अर्ब १५ करोड रुपैयाँ रहेको छ ।