काठमाडौं । अल इन्डिया गोल्डकप क्रिकेटमा नेपाल ‘ए’ टोली आफ्नो पहिलो खेलमा केरला क्रिकेट एसोसियसनको टोलीसँग पराजित भएको छ । आज भएको खेलमा केरलासँग नेपाल ‘ए’ टोली डकवर्थ लुइस (डीएलएस)का आधारमा १५ रनले पराजित भएको हो ।
केरलाले दिएको ३ सय ३२ रनको लक्ष्य पछ्याएको नेपाल ‘ए’ले २२ ओभर ३ बलमा ३ विकेट गुमाएर १ सय ३४ रन बनाएको अवस्थामा पानी परेपछि खेल रोकिएको थियो । निरन्तर पानी परेपछि डीएलएसका आधारमा नेपाल ‘ए’ पराजित भएको हो ।
नेपाल ‘ए’ का लागि देव खनालले ५७ र अर्जुन कुमालले ५० रन बनाएका थिए । कप्तान अनिल साह १९ रनमा अविजित रहेका थिए ।
त्यसअघि भारतको देहरादुनमा ब्याटिङ गरेको केरलाले निर्धारित ५० ओभरमा ७ विकेट गुमाएर ३ सय ३१ रन बनायो । केरलाका लागि अहमद इम्रानले १ सय २२ रनको शतकीय पारी खेले । नेपाल ‘ए’ का लागि आकाश चन्दले ३ र विपिन खत्रीले २ विकेट लिए ।
१६ टोली सहभागी गोल्ड कपमा नेपाल ‘ए’ समूह ‘डी’ मा रहेको छ । नेपाल रहेको समूहमा केरला, गोवा तथा भोपालको टोली रहेको छ । अब नेपालले आफ्नो दोस्रो खेलमा भोलि गोवा क्रिकेट एसोसियसनको टोलीसँग खेल्नेछ ।